Ovakwashiwana vamwe pomudingonoko kofikola Onanghulo Combined School otava nyenyeta eshi vati omukulunhufikola po fikola oyo ota tongola ounona nota anye oku tambula vamwe shaashi vati va shashelwa mongeleka yoshiveva.
Ashike Sedekia Udjombala okwe li patana odo ta popilwa ta ti pofikola yaye ope na ounona vahapu ve li meendodo dopedu va tambulwa, vehe na ile vehe na oufemba woshilongo, no kashina sha nongeleka omo veli.
“Fye ohatu tambula ounona aveshe va dja keengeleka da yooloka vehe na eendjapo domadalo. Onghee ovadali ngeenge ove na enyenyeto kombinga younona vavo nava kwatafane nombelewa yange,” Udjombala ta ti. Ovadali otava nyenyeta tava ti kutya ounona vavo ova anywa pofikola opo shaashi vati ve na oukalata veshasho vongeleka yoshiveva.
Ovadali ova lombwela Kundana kutya Udjombala oha tambula oshike ounona ve na oukalata veshasho veengelaka ngaashi daElcin, Catholic naAnglican. Tava ti oshinima eshi kasha li pauyuuki, nomukulunhufikola na xulife po oku tambula ounona sheli kolelela komaitavelo avo ngaashi naana tashi ningwa peefikola dikwao dopo mudingonoko.
Omudali umwe okwa ti okaana kaye keedula ehayali oka a nyenwa okutambulwa shaashi kehe na ondjapo yedalo ashike oke na okakalata keshasho kongeleka yoshiveva, okwa hokolela Kundana ta ti okwa kala nokukondjifa omukulunhufikola ketameko lomudo ou opo a dule okutambula okaana kaye ashike kemaya kudja ondwi.
“Omukulunhufikola okwa lombwela nge ta ti ita dulu okutambula okaana kange shaashi vati ke na ondjapo yeshasho yoshiveva,” ta hokolola.
Okwa ti okwa kala nokuya kofikola oko ta pula okaana kaye ka tambulwe mondodo yotete ndele iha mono ekwafo la sha.
Okwa weda ta ti omukulunhufikola vati oha ningile ovanafikola ve li meengeleka doivava omatilifo kutya itava shange omakonakono shaashi ve li meengeleka doiveva.
“Pofikola opo ngeenge pe na ounona tava vele omukulunhufikola ke hole ovanafikola tava ka ilikanenwa keengeleka doivava shaashi vati otava kala va tele vakwao eemhepo dii,” ta hokolola.
Omusamane weedula 45 oo e na okaana komido hetatu na ko ina katambulwa pofikola opo, okwa hokolola ta ti okwa udifwa nai komukulunhufikola oo eshi paife okaana kaye ka ninga eedula mbali pedu ina ka kaya kofikola konima eshi omukulunhufikola anya okukatambula.
“Okaana kange ngeno osho oke li mondodo onhi-2 neudo ashike fiyo opapa ina ka mona ofikola. Ka shiwa komudali u na okaana koye ke li peumbo kehe na eshi ta ka ningi omanga ounona vakwao ve li kofikola tave li hongo okulesha, okushanga noshoyo okuvalula.
Onghee ovadali otava indile ouministeli wehongo opo u kale wa talela po ofikola ei, opo udule okukala wa ninga omakonakono kombinga yomukulunhu fikola ou shaashi ovadali vahapu ovalulilwa komalihumbato omukulunhufikola oo.
– fhmalwa@nepc.com.na