New Era Newspaper

New Era Epaper
Icon Collap
...
Home / Ya nyanya opo omukwati koonkondo a shune mondholongo

Ya nyanya opo omukwati koonkondo a shune mondholongo

2021-03-03  Victoria Kaapanda

Ya nyanya opo omukwati koonkondo a shune mondholongo

Aakwashigwana mOshakati oya ningi omunyanyo gwopambili taya indile omulumenhu a monika ondjo moshipotha shekwato koonkondo a shune mondjedhililo.

Omunyanyo okwa li gwa ningwa ohela okuza poositola dhaYetu mOshakati sigo opompangulilo yaMangestalata mOshakati kaakwashigwana taya indile omunangeshefa Sindano Hango, a monika ondjo mekwatokoonkondo lyomupambele gwe, a shune mondjedhililo.

Hango okwa li a monika ondjo oshiwike sha zi ko, ashike okwa li a pitikwa kompangu opo a ifutile mo, a ka tegelele esiku lye lyegeelo, e li kondje yondholongo.

Shoka okwa li sha geyitha aapambele oshowo okuume ya nakukwatwa koonkondo.

Oya li ya shanga omapalakata kutya, eyifutilemo lyaHango moondjedhililo nali talike nawa oshoka kali li payuuki.

Momushangwanyenyeto oya popi kutya, omupanguli Leonard Hangalo ngoka e na oshipotha she, peha lye napu ye omupanguli gulwe, oshoka ke li moshili.

Momushangwa gwa gandjwa esiku ndyoka oya nyenyeta kutya inaya hala omupanguli Leonald Hangalo, a tsikile noshipotha shoka, oshoka anuwa okomisi tayi ungawunga nuulingilingi oyi li metifa okukonakona ombumbo ya futwa Hangalo opo a ekelehi oshipotha shoka.

“Omupanguli ngoka okwa li a mangulula Hango kutya ke na ondjo omanga pe na uuyelele wa za ko-MTC ta gandja ombili sho a kwata mumwayinagona koonkondo,” ya lesha ngaaka.

Oya nyenyeta natango kutya oshipotha shoka shi pewe omupanguli gumwe, keeshi Hangalo. 

“Oshike Hango a pewa eyifutilemo mondjeedhililo omanga a monika ondjo, omolwa shike a pewa eyifutilemo kaapena efatululo lya sha kaakwanezimo yo muyonenwa,  otashi ningwa ngiini ngele opwa holoka sha pokati mpoka omanga omasiku ge, geelo inaaga adha? Ta ya pula momushangwanyenyeto.

Oya popi kutya oshipotha ungwawungwa nuuhasha okuza esiku lyotango, shoka tashi ya dhiladhilitha kutya ohofa oyalandwako nenge oyalandithwa po.

Otaku hokololwa kutya, Hango okwa monika ondjo omwedhi gwayi, sho anuwa akwata omumwayinagona koonkongo mo2014.

Oshipotha shoka osha li sha ekelwahi omvo gwayi, komupanguli Hangalo, no sha li sha shunwa mo shi konakonwe olutiyali kepangalo, sigo a monika ondjo nuumvo.

Hango okwa li a pewa eyifutilemo N$ 10 000 omanga ategelela esiku lyeegelo lye momasiku 16 gaApilili nuumvo.


2021-03-03  Victoria Kaapanda

Share on social media