New Era Newspaper

New Era Epaper
Icon Collap
...
Home / Yaali ya monithwa oshiponga pekankanka lyaShoprite mOshakati

Yaali ya monithwa oshiponga pekankanka lyaShoprite mOshakati

2021-01-18  Victoria Kaapanda

Yaali ya monithwa oshiponga pekankanka lyaShoprite mOshakati

Aantu yaali oya li ya mono oshiponga noonkondo pethimbo lyiikokolokosha ya holoka pokati kopolisi naaniilonga yomoShoprite mOshakati mboka ya wayimine aaniilonga ooyakwao kiitayi yongeshefa ndjoka, mboka taya ningi omahololo gomadhilaadhilo moshilongo ashihe. 
Ongundu yaanilonga yoShoprite, aaxwaxwameki yongundu Affirmative Repositioning (AR) oshowo ehangano lyokukalelapo aanilonga oNafau ya li ya ningi omunyanyo poositola dhaShoprite ehulilo shiwike ndika. Pekanka mpoka otapu hokolowa pwa monene oshiponga omupolisi gumwe nomuniilonga gwaShoprite gumwe.

Omukuluntu oshowo omupopiliko gwopolisi moshilongo Kauna Shikwambi okwa ti, oshingwanima shoka osha holoka Etitano lya zi ko lwopotundi 13h00 yomutenya.
“Omunilonga gumwe gwoShoprite oshowo omupolisi gumwe okwa li ya monithilwa oshiponga pethimbo lyomayipumo mumwe gekanka ndyoka,” Shikwambi ta ti ngaaka.

Shikwambi ta ti, oshiningwanima shoka osha holoka sho ongundu ndyoka kwa li tayi keelelwa okupata ositola koonkondo dhawo.
“Opolisi okwa li ya umbu oshikuti shongumi okuhalakanitha ongundu ndjoka. Opolisi natango okwa li yamangapo omuxwaxwameki gwongundu yo AR Leonard Indongo, ngoka a li amangululwa esiku olyoo tuu ndoka,” Shikwambi a hokolola.

Agwedhapo ta ti, aapolisi okwa li ya kutha etokolo, sho anuwa ongundu yaaniilonga ya li ya tameke okuumba omamanya ngoka ga dhenge aapolisi noku ehameka gumwe gwo muyo. Omupolisi ngoka okwa patulula oshipotha, omanga ka pena nando ogumwe gwo ngundu gwomengungo lyaahololimadhiladhilo a apatulula oshipotha.  Gabriel Haihambo gwomimvo 50, omuniilonga gwoShoprite kOngwediva ngoka a li a yahwa kaapolisi otaku hokololwa e li monkalo yi li hwepo. Edhina lyomupolisi inali tumbulwa, nonkalo moka e li inayi popiwa. 


2021-01-18  Victoria Kaapanda

Share on social media