MAHUNDU – Yene ili yomuhulu wasisole sanaha Namibia John Sinvula Mutwa yana timezi kweli yefelile, nailo bulukwa kwamunzi wahae kwa Mahundu mwasilalanda saKatima Mulilo yamatakanyani. Kubulukwa kwahae nekusindeketilwe kisilutu salitobolo zelishumi kazesupile. Mutwa nafilwe kepelo yasimubuso nikupatalazwa kuba ndwalume wanaha kiMueteleli wanaha Hage Geingob. Nyandi nakile abeleka mwasisole sanaha falitulo zeñata kuzwa silimo sa1990, mane cwalo nikuketiwa kuba yomuhulu wasisole sanaha kiyene ili Muetelei wanaha Hifikepunye Pohamba kasilimo sa2013. 

Situlo sana sweli kufitela apumula famusebezi ñohola. Sapili nakile aba ndwalume, kasamulaho akukena mwamutayi wasisole sakopano yaSwapo (Plan) kasilimo sa1975 mwanaha Zambia. Libuabui zeñata kungelela cwalo niMueteleli wapili wanaha Namibia Sam Nujoma, niyene ili Mueteli wanaha Hifikepunye Pohamba neba fitisize manzwi akulumba Mutwa. Mwamanzwi ahae ane abalilwe kilikwambuyu wasisole, Geingob napakile Mutwa kuba mutanga wasicaba.

“Kitompo kuambola zalisole sakata. Haluswalana mwasililo nimatomolapilu, lutabela bupilo bwandwalume sakata wanaha Namibia,” nekubulezi Geingob. Nazwezi pili kususueza lubasi sihulu bana bahae kunga mutala wandatabona “nikuinuka mwamayemo amatomolapilu, nikuzwisezapata kabubo kahae nikabubo kalubasi lwa Mutwa.” Mutwa usiile musalahae Selma, mahe Catherin Mutakatala, bana bahae, nimizwale baketalizoho.