KATIMA MULILO –Sibuabui wasipalo mwasikiliti sa Zambezi Damien Siambango nabulezi zeo mwangambolo viki yefelile kuli bayahi basikiliti sa Zambezi neba swalisana ni bane baketilwe kubala batu, ili kalulo yene tisize kuli sipalo sizamaye hande.

“Nekubile nilipiho zesikai feela isi lipiho zetuna kuli mane lubize mapokola. Mwalitaba kaufela neli feela kutokwa kutwisiso ya sipalo. Kono kasamulaho akutolokelwa batu neba lumelela babali kuzwelapili ni musebezi wabona. Kono neli feela lipiho zesikai za batu bane babonahala kusa utwana ni babali,” nekubulezi Siambango. 

Kono nihakuli cwalo sikiliti nesitalimani nimatata abalwa sihulu hala linzila sihulu mwasilalanda sa Kabbe ya Mbowela. “Kuna ni libaka zeñwi kokusakonwi kufitwa ka motikala kapa lonji. Una nikutuluhela fasibaka sesiñwi nikuzamaya libimanyana kamautu kuyofita kwasicaba. Kuna nibane balibelezi lonji kuli bayo bala batu kono nina nitumelo yakuli kwamafelo aviki silalanda sa Kabbe ya Mbowela nisona sika feela,” nekubelzi Siambango.

Nabulezi hape hala taba yamazwahule sihulu babazwelela mwanaha Zambia “bane baipata haba bona babali kamaikuto akuli mwendi kimapokola.” Hala kufeza Labutanu ili lene ili lizazi lene litomilwe lakufeza kubala, Siambango nana nisepo yakuli baka feza. “Mwalibaka zeñwi kuna ni butata bwakufeza kubala kacenu (Labutanu) bakeñisa kuli batu nebasiyo famandu abona. Kacwalo babali bana nikukutela kwalibaka zeo, kono nina sepo yakuli batu kaufela mwasikiliti babalilwe,” nekubulezi Siambango.

Sipalo sa kubala Batu ni Mandu sa 2023 nesikalile la 18 Muimunene mi simata kuisa la 18 Njimwana. Naha Namibia ibanga ni sipalo kasamula alilimo zelishumi, mi sipalo nesiswanela kuezahala mwasilimo sa 2021, kono nesi isizwe kwapili kabaka la butata bwa butuku bwa covid-19 ni
masheleñi.