ONGWEDIVA – Omupresidente Netumbo Nandi-Ndaitwah okwa indile aavali ayehe ya gandje ompito kaanona opo ya ninge aakongindjila.

Nandi-Ndaitwah okwa indile aavali ngaaka Olyomakaya sho kwa li taku dhimbulukiwa esiku lyokanona okakongindjila, lya dhimbulikilwa kongeleka yaELCIN kOngwediva moshitopolwa shaShana Olyomakaya.

Uukongindjila ohau longo aanona oshindji, omikalo, uukriste osho wo okulongekidha oonkalamwenyo dhawo.

“Ngame oshiholelwa oshiwanawa oshoka onda kokela muukongindjila, onkene otandi pandula aakuluntu yandje sho ya tula ndje muukongindjila wa pukulula ndje sho nde ende mondjila ombwaanawa, sigo nda thiki mpaka ndi li nena” ta popi ngaaka.

Omupresidente okwa gandja wo oshiholelwa shomusamane gwe, Epaphras Denga Ndaitwah kutya naye okwa enda ondjila ya longekidhwa kuukongindjila.

Ta fatulula kutya uukongindjila ohau dhana onkandangala onene monkalamwenyo yokanona, onkene osha simana aakuluntu ya tume aanona kuukongindjila.

“Nonando pe na etengenekothaneko kutya ombiimbeli otayi etwa moosikola natango otashi kala oshiwanawa ngele aanona taya kala wo taya hiti uukongindjila, momukalo ngoka aanona otaya putuka nawa,” ta popi ngaaka.

Nandi-Ndaitwah esiku ndyoka okwa popi kutya oku uvite ohokwe omolwengathithi lyaanona aakongindjila, oshoka shoka taya ningi oshi na omauwanawa ogendji.

 Omukuluntuwiliki guukongindjila Gretta Gaspar, esiku ndyoka okwa popi esimano lyuukongindjila nokukumagidha aanona ya tsikile okukala iilyo yuukongindjila.

“Okanona okakongindjila ohaka longekidhwa momikalo adhihe, sho shoka haka kala ke na elandulathano oshoka oke shi shoka shi li mondjila naashoka kaashi li mondjila,’’ ta fatulula ngaaka.

Gasper okwa kumagidha aanona ya kuthe ombinga muukongindjila, ta ti kehe gumwe okwa manguluka okuninga omukongindjila no kaashi na kutya okwa za kongeleka yini po.

Okanona okakongindjila Martha Shivolo okwa ti, okwa ningi oomvula ndatu muukongindjila ihe okwi ilongo mo oshindji.

“Onda ilongo nkene ndi na okukala tandi ihumbata mokweendankaamwenyo kwandje, ondi ilongo wo oshindji kombinga yombiimbeli osho wo omikalo nankene ndi na okukala naantu aakwetu,” ta popi ngaaka.

Shivolo naye okwa hiya wo aanona aakwawo yi inyolithe muukongindjila.

-vkaapanda@nepc.com.na