Nuusita Ashipala
Elim-Presidente Hage Geingob kageve mbudi zendi zoruguuwo kwaNguuru gwanare gomukunda Omusati Nangolo Mukwiilongo, ogu gadogorokere konyima tupu apa kavamuhomokerere vamahaka omu kavamutoonene, omu kamuhamenene vamatigona pomukunda gwaElim.
Mutoti kukara Presidente Sam Nujoma, ogu gakere asi muholi gounene gwanakufa nguuru, ntani ogu nye gayagusire kwaNujoma, Hifikepunye Pohamba, navenye kavakere nononkango dokufumadeka nakufa Mukwiilongo, ogu kavahorekere pomukunda gwendi momapeu ganapuko. Geingob ezuva lyehoroko kapandwire Mukwiilongo morwa kweyi garugana siruwo sokukondjera sirongo Namibia simanguruke, nokugenderera kutanta asi ekondjero lyendi vanaligenderere usimbu mokulihagekesa, morwa ngesi age vana mureta pevango lyendi lyokurara pokukahulilira. “ Age kapi nahepa hena, kapi nakara takondjo hena, kapi nazuvha hena kukora, age ngesi ana kalipakerera kumwe nye nomapenda makwawo” yimo ngoso ana kutanta Presidente Geingob. Mukwiilongo ogu gakere asi yige kansela gokuhova momukunda gwaElim, kavamutjangwilire wovanzi asi age gumwe gapira kukara noutjirwe, mokukwama omu gakambekako kuwoko mokukondjera sirongo setu esi Namibia sikamanguruke.
Kwavamwe Mukwiilongo gumwe muretesipo magano, mugara gadiva ekoro, munangesefa, murandesi ntani mugara gakere nomagano gokulisigasiga mokugendesa nkenye eyi, udivi umwe ou nye gagwene posiruwo sekondjero emanguruko. Age kavamuhorekere nefumadeko lyepangero, ano age kavakamuhorekere mayovi govantu. Mugara ogu gonomvhura 92 , kwadogoroka momazuva 24 Kudumonkuru 2017, mosipangero sokulikarera moOngwediva Medipark, omu age kahepere koyito eyi kavamutoonene posiruwo esi kayimuhomokerere yitondi nomauta membo lyendi momazuva 11 gokwedi kwa Kudumogona. Konyia tupu apa kavamuhomokerere, Mukwiilongo kavamukonderere mosipangero saKatolika moOshikuku, komeho vayamutware kosipangero somoOngwediva Medipark. Valili rambangako Presidente Geingob kapi kayitambwire noureru eyi kayihorokerere nakufa ogu, omu yitondi yine kayimuhomokerere, omu yina kuzuvhika asi vamatigona kavahomokerere Mukwiilongo.
Esanseko lyanakufa Mukwiilongo, kuna kutanta asi age kwahepa, kwamuhwika nomarutjeno, ntani kwanyanda unene. Vagazarerwa dogoro papa kunakuzuvhika asi kavavahamatere ntani kapi kavavapulisilire asi valifutiremo modogoro mupanguli moOshakati kapi kayipulisilire oyo nampili nakauke. Kansela gomukunda Elim, Gerhard Shiimi kahundilire vapanguli asi yitondi eyi yahepa kusimona esi gamwene mbwidi momuduva, omu kahundilire asi kwato kuvapa asi valifutiremo. Nujoma katente asi nofa daMukwiilongo kuna hakana muhoko, epanda gahatjira mutoti gombunga zaOPO, ezi zayatwaredera dogoro vayatulisepo mbunga zaSWAPO. Age katente moomu tupu vakara vakwayita navenye, Mukwiilongo kwamona ruhepo omu vamuhwikire nomarutjeno, mahepeko peke ntani kwamutulire modorongo uye wovanyengi vetu vakere tavapangere.
Mukwiilongo kapisi asi gumwe gokugava tupu mukumo, nomagano gekoro, nye age gayirugana oyo gombunga zaSWAPO. Yimo ana kutanta Nujoma. Komeho zo 1990, Mukwiilongo gakere asi hamutjangagona gombunga zovakurupe wombunga zaSWAPO, ano age kwakere nositumbukira sokugendesa mavango goyipungwira. Apa nye sayamanguruka, Mukwiilongo kayakere asi Kansela gokuhova gomukunda Elim, pokatji ko 1992 dogoro 2004 ntani tayakara nye nguuru gokuhova gomukunda Omusati kutunda mo 1992 dogoro mo 1998. Mukwiilongo kwaparuka novena ntantatu ntani vatekuru wokulisigasiga.