Ngendeseso ezi kazikere momaruvara gopampo moutatu kava kamonekere kokapare vakatambure presidente gwaZimbabwe kamarada Robert Gariel Mugabe nomugolikadi gwendi Grace Mugabe ogu ana kuya kara mosirongo momudinguro gopaveta ure womazuva gane. Tupu kaya mwaukire age kuna dwara suta zouburau modira zonomora 737, kamarada ogu gonomvhura 83, kamutambwire moholi zendi gwaNamibia kamarada Hifikepunye Pohamba, nkururu ministera Nahas Angula, ministera gweyiyoponze zosirongo Marco Hausiku novarugani wovanzi vemepangero.VaZimbabwe ava vatunga moNamibia kavazire wovanzi vakatambure mpitisili zawo norusumo oru kavarongikidire rokumutambura ngampitisili. Age kamugendesere mukwawo zendi vaze kevango oku ava tambwire vagenda vangesi kumwe nokuroya mauta aga kaga ndwngumine 21, nokudimba rusumo royirongo eyi yivali norusumo rwaAfrica. Age yipo kava mupere mpito zina omu presidente natara asi vakwayita ngapi vana fana nokumufumadeka hena nomarusumo goyirongo eyi yivali. Vapresidente ava vavali yiyo nye kavatamekere vamorore vaministera, vakarelipo woyirongo, vaZimbabwe ava vakara moNamibia rambangako nombunga dopampo edi kadikere pevango lina ditambure mpitisili ezi pampo. Esi yiso sikando sokuhova omu presidente Mugabe ana kuya dingura Namibia kutunda tupu apa kamarada Pohamba ana gusa epundi kwakamarada Sam Nujoma. Gumwe gatunda moZimbabwe katanterere New Era asi vantu vana gogomoka vakatambure mpitisili ezi zava gusa moukoloni. Age katjangwilire Mugabe asi mpitisili zononkondo.Murarero gavagumuwapayikilire kohotera zimwe zomoVenduka mokumufumadekere.Awo kava kere nonzogera zahana kupulisira nkenye ogu ano kutunda opo yiyo kakadingwire kampani zokawe zedina Lev Leviev, kositenguko. Moomo mezuva olyo age kakadingwire kevango oku vahoreka mapenda gaNamibia, ndi asi koHeroes Acre.Ano neina une age tauyungisa vanangesefa vekefuta moSwakopmund, kumwe hena nokukadingura kampani ezi vana kutumbura asi Namibia Ports Company ntani za Merlus Sea Food Processoer. Komeho aka tengure age mungura age taka uyungisa vaZimbabwe ava vatunga moNamibia. Mugolikadi gwapresidente Mugabe nage kadingwire noprojeka ntatu rambangako zimwe zezi gatulisapo mugolikadi gwakamarada Pohamba, ezi vana kutumbura asi Organisation of Widows ndi Widowers and Orphans of HIV and AIDS in Namibia.Morukwangali asi mbunga zina karerepo ava vafisa vakadi vawo ndi vagara vawo ntani nonsigwe edi dafisa vakurona vawo morwa mukisi ogu goAIDS.