MoMashare-Presidente Hifikepunye Pohamba kahundilire vanasure valitjangese posure zakara poMashare zonondima doyikunwa ndi asi Irrigation Training Centre meraka lyovakwetetu.Evango eli kwakara moKavango yipo asi vantu ava vana kudeura mevango lina vahadukamo hena asi vaguse ruha peke.
Kuna kara ko ngesi vanasure wokusika ko 35 kevango eli.Presidente kava tanterere asi awo kwahorowora ruha roruwa ronondja omu tuna kugazara asi kuvhura kuparura sirongo nasinye.Mukurona gosirongo katanterere valideuli ava asi awo kuna kara nomagano gomawa vahepa kukondja ngorooro yipo varete nondja poruzera morwa udivi wawo.Sirongo esi sapira nondja dasene kusitumbura asi sirongo sina kutameka.Ano nsene ntani ono kutameka nagumwesi nakufumadeka.
Mwahepa kurugana unene yipo musikamene pwanyamweni.yimo ngoso ana kuvatantera presidente.Age katumbwidilire asi epangero lyendi nalivatera paapa lyavhulira mokuvapa mbatero ezi navavhura kupuranampili ngano kuvapa evhu eli navavhura kulima nokuvapaparera marandesero.Mukurona gevango eli lyoyikunwa gedina Siegfried Engels, katanterere presidente asi evango eli kuna kugendapo nawa nakauke -nakauke.
Varongwa ava wokusika ko35 tavakamana malirongo gawo kehagero lyelima eli.Posiruwo sooso nguuru gomukunda Kavango John Thighuru katanterere presidente asi kutunda tupu mwa Sikukutu mvhura ezi kazipwire dogoro mwaMurongankuru mvhura ezi kwaroka tupu zokusika pokatji ko 200mm-dogoro 500mm kwazigwana momukunda ogu.
Morwa mukaro nye ogu nguuru gomukunda kahundilire epangero lyopontambo zokuzeruka vavatere ava naruguma ruteni.Epangero lyetu lyahepa kulituramo livatere vantu valyo.Mokukumbururako presidente kahundilire nompitisili domukunda rambangako dopampo asi vahayitarerera nampili nakauke asi vantu vafe nzara momukunda asi morwa kwato eyi vana kulya.
Age simpe kahundilire vagendesi womukunda vagavere nondja edi dorukukutu kovantu ava runa gumu ruteni.Kutundilira tupu koNkurenkuru presidente kahundilire vantu valituremo mokulima nondja.Age kahundilire varugani woposikunino saMusese sakara moKavango asi valime nondja vakutike vantu.Age kapandwire owo vana kurugana eyi asi vatwikire ngorooro.Vantu vetu kunapumbwa nondja.
Eyi tuna hara ngesi kuna hara kumona vantu vanyamwetu vanakulima nondja dokupopera nomwenyo nadinye.yimo ana kutanta Pohamba.Mwenya projeka Ferreira Sakka katanterere presidente asi muzangu gwawo kuna kugendapo nawa,awo kuna kugazara kugwedererako.Sikunino saMusese kwakara nonomusunda dinasiki konomusunda 1200,awo ngesi kuna kuruganesako tupu evhu lina siki ko290,mokulima epungu.Evango lyaMusese kwakara nokilo 60 kutunda koRundu oze koutokero.Mugendesi gosikunino saUvhungu-vhungu moKavango Hannes Opperman,katanterere presidente asi yiruganeso moyikunino esi kuna sesupa yiyonye yina kuninkisa vapire kulima nondja dononzi.
Muswamane ogu katanterere mukurona gepangero asi yiruganeso eyi vanahepa kuna kupura yimaliwa yinasiki konodola daNamibia dina siki koN$216 000,nayimwe yina kupura hena yimaliwa yinasiki konodola daNamibia N$500 000.
Age simpe katente asi nongombe edi vana kara nado dina kurupa ado kuna kara nomvhura murongo, ano mokudipinganeseramo kuna kupura yimaliwa yinasiki konodola daNamibia dinasiki koN$600 000, Presidente simpe kakamwene Hompa gorudi rwaSambyu Matumbo Ribebe.Ministera gonondima nounsitwe dokotora Nickey Iyambo yige kakandindilireko presidente komudingu gwendi ogu kakadingwire noprojeka edi donondima moKavango.