Rundu
Mbunga ezi vana kutumbura asi Road Administration kazigeve yiruganeso yonzira yina kara mahauto gavali noyiruganeso yokuvhumbwisa noboma kovaporosi vaNamibia woruha rwina.
Yihauto eyi yivali noyiruganeso nayinye eyi ngavayiruganesa mokuvhumbura noboma posiruwo esi vana kukatura teya monzira ezi zina kupura nomiliyuna donodola mokutura nzira ezi zaRundu-zizekoElundu. Mahauto age noyiruganeso eyi kuna kara yomulyo gokusika konodola daNamibia N$621 581.Ano yiruganeso yimwe kuna kara mafano gokufanekesa,yihupuro,makatana,yininke yokupungwira nomutji,maholi,notenga domema,nokompuyuta,nayimwe ngoso.
Ogu katambwire yininke eyi kakere mukuronagona govaporosi Deputy Inspector General for Operations Twefeni M`Lukeni,ogu kapandwire kampani zaRoad Administration mokugava yiruganeso eyi kovaporosi nokutanta asi eyi nayireta dogoro vaporosi varugane sirugana sawo moomu sawapera. Eyi tuna kumona neina apa kuna kara yininke yomulyo komuhoko nagunye,morwa projeka ezi kuna kara zahana asi zoupolitika natuvenye twahepa kulituramo turugane moomu twavhulira. Age simpe kageve mbudi ezi kovantu asi vaporosi wokusika komurongo vana vatura nare vayarugane koprojeka ezi zokuvhumbura noboma. Epangero nare lyatulitra ntere nomiliyuna donodola dokusika koN$4, yipo varuganese evhumburo noboma edi nokuzeresa nzira ezi zopokatji kaRundu naElundu.
Mvhura ezi kazipwire epangero kaligwene yimaliwa pomakongo ganasiki konomiliyuna N$800 kombanga zaJapan zouzuni vayaruganeseko nzira ezi vana kutumbagura asi Rundu-Elundu Road.
Nzira ezi kwazindindira siruwo sosire,yirugana hambara yitameke mwaPembagona nye ngesi kuna kumoneka asi tava tameke noyirugana mvhura zeezi.