ONGWEDIVA – Omukulunhu womangeshefelo yoRani Group Ali Dharani okwa yandja oN$150 000 kopoloyeka yomukokoli Presidente Sam Nujoma opo i twikile okutunga ofikola younona ve li moluhepo i li kofaalama yaye kEtunda moshitukulwa shaTjozondjupa.
Pefimbo a tambula ko omaano, Nujoma okwa ti ofikola ote i tungile ounona ve li moluhepo shaashi vahapu ihava mono ehongo.
Okwa twikila ko yoo kutya, ounona vahapu ohava lambalala ooina keefaalama molwoilonga osho sha etifa ounona vahapu vOunamibia va kale inava longwa. Nujoma eshi okwe shi ninga natango opo a dule okuyandja eemhito doilonga kovanyasha vahapu va mana elihongo lopombada ndele kave na oilonga.
Okwa weda po yoo kutya yee okwa pandula omaano oo, nokuudite etumba lakula eshi pena Ovanamibia ve na ohokwe yoku kwafela mwaasho ahala oku eta po. Nujoma okwa ti ofikola otai ka kala opilima fikola ina nomuhandjo, novanafikola otava ka fikola oshali. “Ngeenge ofikola ya pu okutungwa ondi na ediladilo loku i yandja momake epangelo,” Nujoma ta weda po.
Dharani okwa popya kutya yee okwa kala noku yambidida eepoloyaka dihapu hadi ningwa koSam Nujoma Foundation.
“Ohandi indile yoo ovanangeshefa vakwetu va tameke oku kufa ombinga moku vatela Ovanamibia opo ashike hatu i komesho,” Dharani ta ti.
taimihaihambo2000@gmail.com
Caption: Di hafifa… Nuujoma a pewa omaano.
Efano: Taimi Haihambo