OMUNTELE – Omukuluntuwiliku wehangano lyoRoad Authority (RA), okwa holola euvonayi lye omolwa iilonga yoku tunga opaye Engoyi-Omuntele tayi ende shathimbi-thimbi. Conard Lutombi nosheendo showina sho ya talele po opate ndjoka nelalakano oku tala nkene iilonga tayi ende, okwa adha ko shoka a li ina tegelela. Road Contractor Company (RCC) ngoka oye ta longo opate ndjoka oku li konima niilonga noomwedhi mbali.
“Ondjila ndyika oyi na ookilometta 16.3 ihe ookilometa ashike ndatu dha longwa ko, okuza omumvo gwayi,” Lutombi ta nyenyeta. Ta ti, oshimaliwa shooomiiliona N$43 osha nuninwa okulonga ondjila ndyoka.
Ta gwedha po ta ti, nonando oomilliona N$20 odha li dhi na okukala dha longithwa pethimbo ndika, RCC okwa longitha owala oomilliona N$5.
“Omwaalu ngoka ogwe tu ulukile kutya kontalaka ota ende kashona, omanga twa tegelela iilonga yi kale ya pwa pehuulilo lyaSepetemba,” Lutombi ta ti.
Lutombi okwa popi kutya iilonga yondjila ndyoka okwali ya egululwa pambwelewa omumvo gwa zi ko komupresidente Nangolo Mbumba, pethimbo a li omupevi-presidente.
Ta ti, ondjila ndyoka otayi longwa nelalakano lyoku kwatakanitha ondjila po kati kiitopolwa Oshana oshowo Oshikoto. “Shika otashi uvitha nayi, sho itashi pitikwa nando, ngele kontalaka ita lundulula methimbo twa taalela, iilonga oteyi kuthwa, e tayi gandjwa kwaangu ta vulu,” ta nyenyeta ngaaka. Ta gwedha po kutya iilonga ngele itayi pu, otayi shunitha monima iilonga yaakalimo miitopolwa mbyoka.
Lutombi okwa kumagidha RCC a longe a itula mo.
Okwa uvaneke taya galukile ko ishewe muMei, ya tale shoka sha longwa po.
Omukuluntuwiliki gwoRCC Dasius Nelumbu, okwa uvaneke kutya otaya mana okulonga iilonga momwendhi ngoka ya uvaneke taya mana, Sepetemba nuumvo. Nelumbu, okwa ti, otaya longo nuudhiginini opo ya kale ya mana iilonga. – vkaapanda@nepc.com.na