WINDHOEK Elenga enene lyAaherero nOmupresidende goNUDO, Kuaima Riruako metiyali okwa indile Omutumba gOpashigwana gu yambidhidhe eindilo lyokufutila Aaherero kepangelo lyaNdowishi (Germany) nomahangano gopaumwene ngoka ga likola oshindji okuza mAanamibia pethimbo lyuukoloni waNdowishi moshilongo. Mokupopitha Oparliamende, Riruako ota ti omaindilo gokufutilwa naga yambidhidhwe oshoka otaga kambadhala okutotha mo nokuwapekulula omapuko ngoka ga ningilwa oshilongo naantu mboka ya monithwa iihuna ya vule okutyapula emanguluko li ihwapo okutsikila nomapendulopo gawo yene pamithika dhi thike pamwe. Riruako, ngoka a kwatela komeho oshipotha shi nasha nefutilo lyAaherero, okwa tseyithile iilyo yomegumbo ndika kutya oshigwana shAaherero osha katuka onkatu yopaveta moompangulilo muAmerika – United States, okupula okufutilwa kEpangelo lyaNdowishi omolwomahepeko, omadhipago niihuna ya ningilwa ooyinakulu noohekulu yawo. Okwa yelitha kutya eindilo lyokufutilwa oli ikwatelela wo keyugoko lyiitopolwa oyindji yevi lyAaherero miitopolwa yopaipindi oshowo komikunda ndyoka lya yugwa ooyinakulu. “Eindilo lyetu oli ikolelela keyugoko lyevi lyaa li pauyuuki nopwaa na ofuto oshowo oongombe omayovi dhaantu yetu.” Elenga lyAaherero olya yelitha wo kutya okufutilwa okwi ikwatelela ishewe komadhipago goshigwana shAaherero mboka oopelesenda 80% ya dhipagwa, oshowo Aanama oopelesenda 66, omithigululwakalo dhomihoko dhika nomitungilo dhomalelo goshigwana shAaherero. Elenga otali ti oshigwana she osha ekelahi kokule oonkambadhala dhepangelo lyaNdowishi okuhenuka omaindilo gAaherero, omanga lyo tali gandja omaipopilo okuyukipalitha okufutila kwa ningilwa Aajuda omolwomahepeko, omadhipago niikulumuna ya faathana ya ningilwa kepangelo lyaHitler- Iitila. “Eihumbato lyoludhi nduka kEpangelo lyaNdowishi kashishi sha shimwe shaa shi okatongotongo taka ningilwa aaluudhe, unene Aaherero.” Riruako okwa gwedha ko kutya eindilo lyokufutilwa kashishi oshinima shi ikalekelwa nenge andola pwaa na omatompelo. Ta totha mo okapandi koomiliyuna N$25 milion dha futilwa Aajuda kuAustria, mboka ya hupa miihuna nomadhipago. Elenga tali gandja iiholelwa ngaashi okapandi kobiliyona yimwe oshikwanu mbali dhiimaliwa yaAmerika dha futilwa Aajapani – Aayamerika, oshowo oSioux muumbugantu waDakota mboka ya futwa oomiliyuna ethele nantano. Elenga otali ti omaindilo gAaherero oge li palandulathano lyomafutilo gopaigwana, onkee oga pumbwa eyambidhidho lyopamuhanga nopaukwashilongo okuza koshigwana ashihe. Konima ashike yosheetwapo shika, Omupehaprimaminista Dr. Libertina Amathila okwa tseyithile egumbo kutya oshikundathanwa shika osha nika uuhwenge noshi na okuungaungwa nasho nuukeka. Omutulipo gwelandulathano goSwapo, Ben Amathila okwa zimbula oompata sigo etine tali landula. Aaherero oyendji ya zala omizalo dhopamuthigululwakalo okwa li ye ya moparliamende okupulakena kosheetwapo shika.