I Kae Matundu-Tjiparuro OTJOMUISE Ovaherero ma venakaura ongondjero ongundi yo horomende yo Vandoitji okutara kongotue yomapu woveta ndinondi ngehina ondengu okupata Ovaherero otjisuta ngunda mo mwinyo tjingewo aisuta Ovayuuta komauhazendu tjingewo ngatjitua kuwo iyo tjihoromende tja Hitler, Ombara Otjitambi yOvaherero, Kuaima Riruako, matja. Pomazemburukiro oetja 102 wOvita vya Hamakari mOkakarara Oritjatano ndazuko, Riruako watjere ongaro ombi oha hungirirwa ko youhonapare wOvandoitji indji iraisa omirungu vivari nu ihendeka ouwa natja ondjito yombangu yotjivara kovazoozu avehe nu tjinene kOvaherero. Wina watjere ondjambu kourizemburuka wouye. “Matukaenda komurungu notjirwa okurirwa otjetu nganduu otjina ihi tjitjatuwa korutuu ro mahungiriro rotutu peke peke tuo Muhoko Omikutasane oku hungirira ko no ku zengurura.” Riruako watjere ovo mavetjiwa kutja pena ozongondjero zetiku notukosi tuo kuhana oumune wouye motjina ihi. Watjere mave kwekurura no kuhina ondira ozongondjero zouhonapare wOvandoitji no vaza pamwe nawo okuungurisa oumwano wokuhana no kuhonapara mokati kovandu vetu okuremanisa otjiungura tjotjisuta. Watjere omatuvasaneno wOvaherero ngeripo nai kutja omuni no muna o usemba mo tjisuta oune nawina ozongondjero zo kupirura o usemba we otjomunane ku kwerikwamba okuhina ongurameno ko horomende ya Namibia, otjiraisiro tjo kutja pena eke mo hamunika ndi tjitira wina okupenga ombango no ku hambeyisa omerikotameno wao kungeri omapu wa katjotjiri. “Tuna ondjiviro no tjimariva tji tjayandjua na tjitjiri mondjira koo kaani kourike wao no tutu tjiva monguyu yozombatero o kutuninikiza kutja tuyandje omatando wao ku imba mbevanga otjisuta,” Riruako watjere. Wa wezire ko kutja inga omarandero wondondo yokombanda. “Posyo ete ka naa turiyandja kepwa nozondeku zomatiku no ngunino yomburuma.” Watjere Ovaherero otjiwana tjomasa tjitja wanekwa iyo makuruhungi nawina iyondando imwe mombwiro.