I Kuvee Kangueehi OTJOMUISE Ombara Otjitambi yOvaherero, Kuaima Riruako, Oritjatatu wa kavarurire o Presidenda yehi, Hifikepunye Pohamba, po mberoo no maturiro tje kemutjivisire ouyenda we katjisupi kehi rOvandoitji pa kakarere pomahitisiro wombepo yOtjitiro Otjindjandja tjOvaherero nOtjisuta mondjuwo yozoveta yehi indo. Riruako ngwari puna ovanane vombazu nomutue wondanga mezuko wo Nudo mOmbongarero yOtjiwana, Arnold Tjihuiko, wa tjivisire o Presidenda kutja wari no hange no mahungi wounepo wOndjuwo yOzoveta yehi rOvandoitji. Watjere nambano watanda okuryangera oviwana peke peke mbya ihamwa okutara mondjira komurungu. Watjere wari nombongarero yozombuze komurungu wo mahitisiro wombepo indji payandjere ehi ro kongotue ohunga no vitungaungura vyohuurire vyehi rOvandoitji mo Namibia. Mokuhitisa ombepo indji otjira tjitji pikira komamuho ihi o Links, tja ningirire ohoromende yOvandoitji okuyakura omeriziriro wayo wo makuruhungi no kuzemburuka ousemba wOvaherero nOvakwena wo tjisuta kOtjitiro tjao Otjindjandja tjitja tjitua kuwo iyovimbumba vyo ndjeverero mo 1904 nganduu mo 1908. Ombepo indji tjazumba yahindirwe ko komiti yoviposa vyopendje yondjuwo indji. “Wina mbatokere okomiti indji okuyandjera imba mbaihamwa okurihungirira oveni komurungu wayo tjimaitoora ondiero tjandje ina ondjiviro.” Okupitira mOpresidenda, Riruako watjere ndoondoo kovira peke peke mOndjuwo yOzoveta ya Namibia mbya yandja oruvara kombepo yOtjitiro Otjindjandja natja oruvara rwavyo rwatjita kutja epu indi ririre rotjiwana atjihe. Pohamba watjere mouyenda we katjisupi ko Londona omukuramenepo wa Namibia Peter Katjavivi we mu kwamberere ko neye unohange ohunga nouyenda wombara nomahitisiro wombepo indji. We mu tokere oku hakaena noviwana vyarwe mbya ihamwa kutja vehungire eraka rimwe motjina ihi. Otjiveke tjitjazuko otjiuru tjOvaherero wina wa kavarurire Opresidenda Ondikamise ya Namibia Sam Nujoma oku ke mutjivisa ouyenda we. Tjingetjo wa ningirirwe okuungura noupatje ku na imba mbayandja oruvara ko mbepo indji kutja ondando oseinina yotjisuta iurisiwe. Okuza kOmandaha Ombara Riruako ma ka ryangera otukondua peke peke oku katjivisa ovanane vombazu varwe. Matenge mOkotjituuo tjazumba ai kOkakarara ngunda a e hiya kapita kOkunene, Erongo na Hardapa na Karas.