RMB Namibias ge N$398 500 maris ǀkha OMBA ǂNuwiǁkhāsib ǂGaesa ge ǀgaiǀgai

RMB Namibias ge FirstRand Namibias ǂgaes !nâ-ū N$398 500 OMBA ǂNuwiǁkhāsib ǂGaes, ǁnāti ī ǂnûiǂgās hîa Namibiab ǁnae-aon, ǀkhō-aon, ǂnuwi-aona ǁāǁās ǀkha a dīxuxa tsî !hao!nāsi ǀumide !khōǀgarasa ra ǂgaoǂgao!nâsa ge mā.

OMBAS ge marikurus ai !gao!gaosa tama ǂnûiǂgās hîa 30 kurigu !oede ǁnāri ī ǀkhō-aon tsî noxopa ka hâna !khō!om !goaxasa, !gosase, ǁîn hîa !garo!ā ǀhûhâsigu !nâ Namibiab !nâ ra hâna. ǁÎn ge !hao!nāsi tsî nē ǁae!gâs !nâ ra sîsenūhe !omkurusa xūn tsî San di kuruxūna ǂoaxa-ū tsî ǁamaxūs !aroma ra ǂgaoǂgao!nâ. ǂHanusi ǁkhaeǁnâs ǁaxasib tawas ge Kirsty Watermeyers, ǁNâuǂharugudi Danas, FirstRand Namibias !Nans disa ge mî, ǁîn ra ǁgau!nâs, ǁkhāǁkhākhâis tsî ǁkhāsigu omkhâis, !gōsase tarekhoesiba !khōǂgā hâse ra mâxōǀkhā tsî ǁnās ǀkha hoaǁae ǁîn !nâ ra ǁguirisa. “30 Kurigu ǁaebas ge OMBAsa ǁnāti i !âubasensa ǂkhawusa tsî ai!â ge khaohâ kaisa-i ǀhûhâsigu Namibiab diga ra mā.

Nē ǂgaes ge ǂgui !gâi!gâna sī!nâ hâ, ǂnuwiǁkhāsib !nâ !â khoena ǂkhâ!nâs ǀguis ose, xawe ǁîna ǁkhāsigu âna omkhâis !nân ǂhâba hâ huisenxūn ǀkhas tsîna huisa ǁkhāsiga sī!nâ tsî ǁîn ǀhûhâsiga omkhâi tsî !hao!nāsi ǀumisa sâuǀgaras ase,” tis ge Watermeyersa ge mî. RMB Namibias ge a ǂkhâ!nâ-ao, ǂNuwiǁkhāsib Sâuǁkhāsiba kurigu !oede ǂkhâ!nâ !goaxa ǂnûiǂgās ase ǁnāti ī ǀō-aisa tsî ǂhâǂhâsa !âs OMBAs ǀhûhâsiba omkhâis !nâ tsî ǂan!gâ. OMBA ǂNuwiǁkhāsib ǂGaes ge sîsenmās !ēde ge ǂnuwi, 600 xa a !nāsa ǀguiǀguibe khoen, !nāsase di tarekhoede hâse. RMBs di marisihuib nēb ge ǁîs di ǁguiǂgāsens tarekhoesiba ǁāǁā tsî ǀgaiǀgais tsî nēs !nâ-ū ǁkhāsib aitsama mâbasensa ǀaokhoen tsî ǀhûhâsigu !nâ īǁkhā kaisa. Isabel Katjavivis, direkters, OMBA ǂNuwiǁkhāsib ǂGaes dis ge nē ǂgaes di ǁgūbasa ǀgonǀgon!gao tsî ge mî, sâuǁkhāsib aitsama mâbasens ais ǂâisa hâ tsî Namibiab !hao!nāsi ǀumisa sâuǀgaras tsîn ai !khaisa. “Sida ge ǂgaoba xu RMB Namibiasa ra gangan, ǂhâǂhâsasib OMBAs ra dības ra mûhō tsî nēti ǂkhâ!nâ da !khais !aroma. Nē marisihuib ge kai ǀkharaǀkharasiba dī da ra sîsenni !nâ nî hā-ū tsî da ge a !âu ǁoa ǁnā sîsenǂuiba hā nî ǁkhâgu !nâ sadu ǀkha ǀgoragusa,” tis ge Katjavivisa ge mî.