MoNkurenkuru yiso sikado sokuhova omu RP ndi mbunga ezi vana kutumbura asi RP zina kukakara nosigongi sazo sosinene momukunda gwa Nkurenkuru nsene okwama tupu masanseko.Evango eli vana kukatura mahoroworo godoropa modoropa zompe ezi vana tura ntaantani zikare doropa zouvali momukunda Kavango kwa kere evango lyombunga zaSWAPO kwato kudanenamo gopeke. RP ana tokora asi age tatjokatjoka SWAPO. Apa kakauyungisire konyara vantu wokusika kesere Vahameni va RP Konontere domukuro gwaKavango,presidentegona gombunga zina Geoffrey Chilinda katente asi age ana kara noudigu asi nombungampatanesi moNamibia Kapi dina kutompora yuma mosirongo esi.Ano zendi udigu ou kapi nauziguma awo nava rugana paapa vahulira asi ngano varuganeko yuma,omu vana lituramo vatantere vantu vawo vakahorowore varetepo ekuliko moNkurenkuru. VaNamibia vana hepa nompitisili donompe.Ose kapi tuna karerepo apa kupatanesa tupu nye ose kuna kuvatera epangero eli lina karako ngesi.Litupe mpito mokutuhorowora yipo tumuvatere mokukulika sirongo esi.Age kahundilire vahameni vawo vakahorowore RP apa nalisika ezuva lyomahoroworo mo 23Nsinano mvhura zeezi.Nye nampili ngoso koveli woudwa kuza vakahorowore konombunga politika nadinye,nye takamesi asi mbunga zaSWAPO kapi tavayirugana oyo.Nsene navavapa siruwo Rp kuvhura agendese doropa zina nokuzikulika eyi vana kugazara awo asi nampo SWAPO kwamuvhura.Ose tuna retamo malitjindjo,esi sikare nye sinka seni asi kupi muna kukahorowora.Mwahatarerera vamutjilise ndi asi vamupangere asi kupi ono kukahorowora.One ngomu kara vamwe ngomu gwanenemo uwa mombunga ezi.Apa kalikidire vakandindate vawo age katente asi mwahavatjira ava yiwo nompitisili deni ava ngomu kahorowora ngava gendesa mukaro nagunye godoropa zaNkurenkuru. Vakandindate vawo navenye wokohi zonomvhura 20,eyi walye yina kuliza neyi vana kutanta asi vana hara kuretamo vadinkantu.Moutano womazuva 23 Nsinano kuna kumundindira namuvenye one muna kara noyikarata mukahorowore.Nzira ezi vana kukodoka zokutunda koRundu oze koNkurenkuru RP nage kazitumbwire nokupa epangero unzoni.vantu ava vana karerepo RP kuna kara Reino Simbungu,Raimo Hausiku,Maria Kapumburu, Joseph Sitanga,Regina Marungu,Petrus Pontalia na Magdalena Siteka.Mberewa zomahoroworo ezi zina kutarera mahoroworo kuna tanta asi ekondjero mavango konombunga politika kuna kugendapo nawa.Eyi kava yigeve paapa New Era kavapulire asi ngapi yina kugenda. Eyi kuna kumoneka asi ngayigendapo nawa morwa vantu vetu ava vana kutuvatera tuna vadeura ngava rugana yirugana yoyiwa.yimo ana kutanta Mingelius Nico murugani gokomberewa zomahoroworo.Omu vana kugazara kukaruganesa nomahina edi nadi vavatera.Eyi yina kutanta asi mazwi nagenye ngava gavarwirwa pevango limwe tupu moNkurenkuru.Nokuyikona-kona.Awo hena ngayi varerupa mokugwana madina,asi yilye ana kuruganena pevango lyongandi.Eyi kuna kuyiruganena morwa vantu ava ava sivana asi mahoroworo kapi gana gendi nawa ano ngesi awo vana yidiva asi kwato kapi ngakukara masivano nampili gongandi.Ano mokureta marundururo awo vana liwapayikire yipo mahoroworo aga ngagakare gomawa gahana ufuki.Moomo moNkurenkuru – nombunga politika dimwe edi datura vakandindate vado awo vahana asi vatungimo modoropa zaNkurenkuru ano vamwe kapi vana kara noyimbapira yokuhorowesa.Nombudi kuna kara asi awo kuna tjindji vakandindate vawo mazuva tupu gongandiko vaze momahoroworo.Hambara ukarepo umbondo nye kava ugwene usimbu yiyo yina kara asi ngesi kuvhura vakahamenemo navenye. Umbondo wangesi kapi una gumu mbunga politika ZaSWAPO,ano edi nonkwawo kuna digumu momunene.Simwe kuna kara asi vakandindate vawo vamwe kava tundiremo mokukakara asi vakandindate wonombunga odo awo yiyo kavayalipakerere kombunga zaSWAPO.Epuro kuna kara asi vene owo kava rugene oyo vana sikisamo eyi zina kutanta veta asi mokuhamena momahoroworo gaNkurenkuru vakandindate vankenye mbunga politika vahepa kusika vatano navavali,ano vatatu vahepa kukara vakadi.Mbunga ezi zina kutarera mahoroworo zahepa kuyitara eyi yipo asi yahakareta mapiyagano komeho oko. Nampili ngomu yina pilire kukara paveta ose tuna yigwana asi eyi yimo kayihorokere kovantu vetu ava vana pilire kuhara kugava madina gawo.