Rundu otayi ka kala oyo ehila lyiinyangadhalwa sho oRundu Colour Festival tayi ka kala ko momasiku 30 Desemba. Oshiindingili shika tashi ka kala ko uule womasiku ge li gatatu otashi ka ningilwa pokapale koRundu Sport Stadium.
Omuunganeki nomunani gwoshiindingili shika, Jerry Kauyu okwa lombwele Nampa mEtine kutya mpaka aantu ohaya gongala omumvo kehe moka mu na omaudhano ogendji ga yooloka osho wo omainyanyudho galwe opo ku kwatathanwe naagundjuka mondoolopa ndjika.
“Elalakano enene lyoshiindingili shika oku eta aagundjuka pamwe pethimbo lyomatango omanene osho wo okugongela oshimaliwa shoothigwa naanona yalwe mboka ye li moluhepo moosikola dhomiitopolwa yaKavango West naKavango East,” ta ti ngaaka.
Omizalo dhosikola otadhi ka gandjwa koothigwa dhi li 60 koosikola mbali moshitopolwa, Shimpanda Primary School osho wo Karangana Primary School. Oshiindingili shika osha li sha ningwa mo2015 no2016 ashike inashi ningwa mo2017 oshoka okapale oka li ka longithwa muudhano wopremier liha noka pwa li we ehala limwe tashi vulu okuningilwa, omuunganeki ta fatulula ngaaka. Kauyu ta gwedha ko kutya omumvo nguka oya hala oku shi ninga oshinene okuyeleka noomvula dha piti, onkene etokolo lyoku shi ninga uule womasiku gatatu. Okwa gwedha po kutya kape na aakwashilipaleki sigo oompaka, ashike okwa ti ope na etimaumbwile. “Otwa tegelela omayamukulo natango.” Osho a ti ngaaka.
Omaudhano ngoka kwa tegelelwa ongaashi ovollyball, okatanga kokoompadhi kaaadhani yaheyali kombinga, onetball, okunana ongodhi ku talike mboka ye na oonkondo, okuhinga oombasikela osho wo okutondoka oshinano shookilometa ntano. M.I.G, Dj Ambizzy naJoac Nongava oyo taya ka mwenyeka nuutekete otau ka adhika moositola adhihe dhaPick n Pay oshilongo ashihe.
(NAMPA)