John Muyamba
Rundu-Vatungimo modoropa zaRundu unene womarukanda Ndama, Kehemu ntani Millenium Park kapi kavakere nomema mosikondovike kasipwire ano dogoro nkera nopomba kuna kara dahana mema, siruwo oso Namwatere vakara asi yiwo ava kava mema kondango zodorpa zaRundu, kavahagekere kugava morwa kapi vafuta eruganeso mema. Ame kuna tanterenge nayina asi ndango zina kafuta yimaliva yokusika koN$500, 000 ano awo kunatanta asi mema navagapaturura komeho tupu likatoke ezuva.
Yimo ana kutanta ngoso mukurona godoropa zina Verna Sinimbo, apa katumupulire kuhamena udigu womema modoropa zaRundu. Kutunda tupu mokwedi kwaKudumogona, mema kugagwana mokulihenga kuruganesa nometa vaturapo modoropa, eyi yakara asi nkenye apa ndango zodoropa zahepa kufuta mema ndi asi kuranda aga naga za kwankenye meta yina kara asi nsnene nye vana yiruganesapo, hawe makura kwato mema, yimo nye yina kumoneka ngesi.
Ose kapi avatutantere nosiruwo asi nometa doge dina pu, ndi asi donosensu dina hupuko , yimo ana kutanta ngoso nokutanta asi nonzira nado kapi dina wapa. Doropa zaRundu kapisi yiso sikando sokuhova vana kukara noudigu womema,. Nampili papa yakere asi doropa kuna kuzitura konometa, vantu ndi asi vatungimo kwamene kanyando kuhamena mema.
Mvhura zina puko, ntani ketameko tupu lyo2017, kupata mema kwakara asi simwe tuna kuparuka naso, unene mosikondo vike, unene korukanda ngwendi Millenium Park, Kehemu naNdama eyi yina kuninkisa vantu ngesi asi vana handuka.