Mukurona godoropa zaRundu ndi asi Mayor, Verna Sinimbo katente asi ndango zodoropa kuna kara nomagano gana kwata moyitji mvhura ezi, ntani nomvhura odo dina kuwiza, yipo varete ekuliko modoropa zaRundu. Egano kuna kara asi kuwapukurura nonzira, kugwederera marutjeno, unene ngwendi momarukanda gakundurukida doropa ngwendi Kaisosi, Kasote, Ndama ntani mbindakano zaSauyemwa ntani kutara asi doropa zahepa kuzera. Kutura marutjeno ndi noramba mononzira, unene ngwendi monzira zonene, Trans-Caprivi /Trans Zambezi yiyo yimwe yina kara melikwamo natutura moyirugana monomvhura edi ntanometwaromo egano lyetu kutunda mo 2014 dogoro 2019. Ose tuna kara negano mokutura noramba kukwama nzira zetu zaTrans Caprivi/Trans Zambezi nampili 5.6 kilometa, unene nzira ezi zapita modoropa zetu. Apa tuna kuuyunga ngesi vantu kutaguruka nzira ezi vaze mesinya mwina nye kumoneka asi nepu linatoko hawe awo vahepa kugenda momundema. Ntani awo kuna kugazara kutura nye noramba nkenye oku kuna wapere, ngwendi kevango lyonongesefa. Mokukwama nye nzodi zetu, nokutura malikwamo getu, ntani kukwama nongendeseso nadinye, hawe ose naturugana moomu twavhulira tuture elikwamo lyevhu valiwapukurure yipo tukare nonompito dokuhamena koekonomi yimo ana kutanta ngoso mukurona godoropa zaRundu. Mvhura ezi ose tuna kara negano twaromo lina kwata moyitji, mokutunga omu nagaapitira mema, ntani omu navawapukurura mema komeho vakagaruganese. Yipo tugwana oku yina kutunda oyo ntani nokutara meho zetu. Ndango nazitunga omu nagapitira mema, rambangako nopomba edi nadigava mema kovantu avagwana nzambi zonunu wokusika ko 300
Ndango zodoropa simpe naziwapukurura nonzira ngwendi dokorukanda rwaSafari naSauyemwa ntani kutamununa nzira zakugenda mahauto mositarata saEugen Kakukuru yipo vature nonzira dina gwanene mokuza pomusunda vaze ponomundiro ndi asi norobot dopombanga zaStandard Bank diwape nawa yimo ana kutanta mukurona godoropa.
Eyi kuna hara kuhorako siruwo kovaruganesi vetu nzira ntani yipo twahepa kuza nomu guna kukura muhoko noyihepwa yawo. Maria Mwengerenge ngesi kuna kuza nye tukaziture tarred ndi ziwapa nawa, kutamekera tupu apa zatamekera nzira zina dogoro kookwina zakarugwanekera nonzira za UNAM, Rundu Campus. Eyi nayinye kuna kara asi ngapi natugwana yimaliva yokuwapukurura nayinye oyo. Egano kuna kara asi kuvhura nsene yimaliva tuyigwana hawe teya zelike dogoro mevero lyaUNAM. Ntani egano lina karamu kuna kara asi nonzira nadinye dina kara makero vahepa kudiwapukurura. Ndango ngavakara tavaturapo elikwamo lyokugwanekera kumwe novatungimo mokuvavhatwilira asi yinke zina kukarugana ndango zodoropa. Elikwamo ntani maudigu aga vana kara nago. Ntani nye natukara nelikwamo lyokutendaringa omu navenye vadiva kurugana oyo ngayivazegurukira moomu yakara vaturemo mahundiro apa asi tavakarugana yirugana oyo. Ame kuna kuhundira vagolikadi asi nawo vahepa kukalihameseramo momarumbasano aga. Elikwamo eli ngaliretesapo yirugana kovatungimo yimo ana kutanta Sinimbo.