RUNDUS – Rundus di ǂHanub ǀAeǁgâub ge ǀaweǁguigu ǀkha a ǀhawe in nē ǁkhâb !nâ ǁnāti i sorodi hîa !kharu ge koro kurigu di ǁaeba, ǂanǂuihe hā tama i tsî ǁkhāti ǀnîna ǂanǂuihe tsî xawe hā ūǁnâhe tama ǀaokhoen xa ǁkhōdi !aroman dide ǁkhōǂgā. Nēpa hâ sorodi ge koro kaikhoen tsî disiǀguiǀa îaron tsî ǀgôaron hîa kurib !naka hân dide. “Sida beros ge nē ǁkhōs aiǂhomisendi ǀkha a ǀhawe, ǀaweǁguib nî ǂhanuse !gûs kara o da 17 ǀKhūǁkhâb dis ai 9 irsa ra ǂâi!nâǁguibasa. ǁKhōs mâpa nî dī nî ǂanǂanhe, !ereamxasib !khaib dib Rundus !Ā!khōmais ǀAwemā!nans tawa ǁgoe amaga, aiǁgausen ǁîna ǁkhō!nâhe nî āb tsîna nî khaose ī xui-ao,” tib ge Andreas Kuwemab hîa a Rundus ǂHanusi ǀAeǁgâub diba ge mî. ǀub nēb di ǂgaeǂuis !oagu in ge ǁîna
ǂomxase !kharu ge kurigu !nâ ǂhôaǂgares !nâ-ū nē ǁōǂoa hâna a ǂan khoen tamas ka i o ǀaokhoena gere ǂgaikhâi, hā tsîn nē sorode nî ǂanǂui tsî ǁkhaeǁnâhes !aroma xawe i ge nēsis kōse !nōba ge ǁgoe. Nē mâsib ge ǀawemā!nansa ge ǁgari îs ǀgâkhoe ǁkhōsa nē ǁōǂoa ge khoena mā. “Sida ǁōǂoa hâ sorodi !khai!khai!khaib !nâ da ge kuriga ǁgoe kaiǀoa hâ khoen tsî ǀgôaron sorode ūhâ; îaron tsî !naes ǀkha ra ǁō ǀgôaron sorodi ge ǁgûdi xa ge ǁnāxūhe. ǀNî sorodi ge khoen hîa ge ǀaeǁgâub !nân ǀae!khōde ra !khō!oase a ǁōn di tsî naude ǁnāti ī ǁōhâ sorodi hîa ǀawa!namn xa !kharaga !khaigu ai ūkhâihe tsî ra hā-ūhe, xawe tātsē hā ǀaokhoen xa ǂanǂuihe taman di hîa,” tib ge Kuwenaba ge ǀaro. Rundus ǂharugu!khaigu di ǀguib, Angel ǁKhō!oabas ti ǀgui a ǂansas ge ǁîs nî ǀhûhâsiba !oabas !âb ase nē khoen !aroma ǁkhō!nâhe nî kāga mā ti ge mî.