BRAVO – 100 xa a !nāsa ǀgôaron hîa !nonasa xu !nani kurin ǁaegu hân, ǂkhawusa khaohâ kaisa ǀhûhâsib, Bravos hîa Mpungu ǁhûi!nâǂharis, Kavangob Huriǂoas !nâ ǁgoes din ge nēsi ǂgaoǀkhāsa !harib ai hâ !Oega ǀGôana Omkhâis Sentersa (ECD) ge !khō!oa. Nē senters ge Langman Tame Early Childhood Development Centre ti ǀgui a ǂansa tsî ǂhanusise ǂoa ge wekheb di Wunstaxtsēs ai ge ǁkhowa-amhe. Nē ECD senters ge N$5.3 miljuns xa a !nāsa maris ǀkha ge ǂnuwihe. 

ǀGôaron ge ǂgurosa !gâi mâ hâ tama ommi !nâ senters tawa ǁgau!nâsa gere !khō!oa. ǀAsase a ǂnuwisa !khaib ge sores ǀgammi ǀkha ǀkhaiba ra mā ǀgam ǁkhā-khā!nā-omra, beros, ǂûsâi!nâ!nā-oms, xūn sâu!khaib tsî gôaron ǀkha ra ǀgau ǂkhari-omdi tsî !hanas tsîna !khōǂgā hâ. Nē senters ge !nona ǁkhāǁkhāǂuisa ǁgau!nâ-aon hîa Bravos !nâ ǁgoe ǂkhamkhoena xu ge ǁhûiǂuihena ūhâ. 

ǁKhātin ge ǀgôan tsî ǁîn !ûi-aon tsîn hoana ǀgam ǀoasa tsî ǂûǂûxa ǂûra tsēs hoasa nî !khō!oa. Nē -axasib tawab ge Mgungus ǂgiǂgosi ǀawemā-aob, Titus Shiudifonyaba ge mî, nē senters ǀgôan skoli !nâ nî hâǀgarasa nî ǁ-awoǁawo, nausab ǀawemā-aoba ǀgaisase gere ǂâiǂhansen, ǀnî gôaron kaise !nūse sentersa xu ra hâ tsî ǁnās xa !aromahe hâse !nūse nēpa hās !aroma ra !narisa. 

“ǀGui ǂhâǂhâsa xū-i hîa da sida ǂhanuba ra ǂgan ǂgao-i ge, mâtin hostelsa nî !gâi!gâi!nâba da !khaisan ga kōǀî !khaisa, in nē ǀgôarona hostels !nâ hâ tsî tā 100km xa a !nāsa !nūsiba Mpungus tamas ka i o Tsintsabes ǁga tsēkorobe !nari. 

!Nūsib guiba hâ tama i tsîn ge nē khoena ǀgūse hâ klinik-i tsîna ǁîn ǀaekhōdi !aroma ūhâ tama hâ, tsî ta ge ǁnā-amaga ǂgansa Ministeris ǂUrusib tsî ǀHûhâsi !Oabadi dis ǁga ra dī, ǀae!khō-ao-e sîsba dasa nē khoena kō!gâs ǀae!khō !oabadi ǂnamipes !aroma,” tib ge ge mî. !Nakaǂnôa ministeri khaohâ kaisa khoen dib, Royal ǀUiǀoǀoob, ge haisi-ams hîab ge Kavangob Huriǂoas aiǂnû-aob, Joseph Sivakuba ǁîb ǀons !nâ gere ǁkhaeǁnâs !nâ ge mî, ǁgau!nâs ǁnāti ī ǀgaiba !khōǂgā hâsa aitsama omkhâisens nē khaohâ kaisa ǀhûhâsib dis !nâ. 

!Nakaǂnôa ministeri ge ǀhûhâsiba gere ǂgaoǂgao!nâ, in nē sentersa hîgagahes !oagu !ûi tsî ǁawo-awo ǀgôaron nēpa nî xoaǂgāhe tsî ǂgâ!kharusa. 

Kingston Makonib hîa Palms for Life Fund Namibias ǀons !nâ gere !hoab ge ge mî, ǀgôaron !gâi!gâb kōse nî ī xūn !nâ -ǁguiris ra !gâi !goaxa ǁaeba -îna aiǂhomibasa ǁawoǁawo !khaisa. 

Nēs ge khoeseǁî ECD senters nē ǂgaes !nâ-ū ǂnuwihe hâsa, ǁîs ge 2019-î kurib !nâ ǁîs huib !omma a ǀhōǂuitsoatsoasa xu. Nau senterdi ge Omahekeb, Otjozondjupab, Oshikotob tsî Omusatib !nâ a omsa.