Auleria Wakudumo 

Opolifi moshitukulwa shaShana otai ka patulula pambelewa oshikonga peenhele adishe domainda omeendjila molwa omatango manene oo twa taalela mOmaandaxa omafiku 16 Decemba. 

Eshi omukulunhu wopolifi mOshana, Commissioner Naftal Lungameni Sakaria okwe shi holola pefimbo ta shiivifa omadina aavo va mona omaifano mape oshoyo oku va dika eembadi meembonge dakula dopolifi moshitukulwa shaShana mOshakati. 

Sakaria okwa holola ta ti nande ova tameka nale okupatolola, otashi ka patululwa pambelewa mOmaandaxa. 

 “Otwe lilongekide okutuma ovakalekipo voveta nelandulafano vahapu shaashi otwa teelela okumona omwaalu muhapu wovanhu okudja keenhele da yooloka, tave ya okutyapula omatango manene. Otu na okukala twa tula po omainda meendjila opo tu kwashilipaleke kutya kape na onhele yookalyamupombo moshitukulwa,” Sakaria ta ti. 

Sakaria okwa holola ta ti mEtitano vati ova tula moipandeko omuhanga weembudi da li tadi kendabala okuteya ouflat mOshakati. Sakaria okwa ti eshi ove shi pondola mekwatafano liwa novakwashiwana ovo va shiivifila opolifi meendelelo.

 “Vavali vomwaavo vali tava kendabala okuteya ove li tava kongwa kopolifi nale moibofa yokuteya omaumbo mOmusati oshoyo moshitukulwa shaKhomas naumwe okwa kala ta kongwa kopolifi mekwatafano nokuteya poBlack Chain mOvenduka, sha ningwa oule womwedi wa dja ko lwaapo. Eshi otashi holola kutya eengangala ode liteyaulila nale moshitukulwa shetu okudja keenhele nokoitukulwa ya yooloka. Ashike otu na okukwashilipaleka kutya ovanhu va tya ngaho otwe va kufa mo moshiwana nokuva tula modolongo. Onghene nava shiive kutya ngeenge ova kendabala okuuya ko kOshana, ove na okulila okili mokalimosho,” Sakaria ta ti. 

Sakaria okwa ti otava ka nghonopaleka eameno lovakwashiwana pefimbo lomatango manene nokukwashilipaleka kutya ookalyamupombo ova tulwa moipandeko.  Sakaria okwa weda po yo kutya otava ka kwashilipaleka kutya ova tuma omwaalu wahenena wovapolifi unene apa pe na omainda. 

“Ohatu ka kwashilipaleka kutya eepate oda dingililwa kovapolifi, ava tava shingi vehe na eembapila dokushinga ova pewa omahandukilo, naava tava shingi ve li koshi yodungo ova tulwa moipandeko, omanga eetuwa inadi wapa okulongifa opate oda kufwa ko kopate, nolwaxuuninwa okushingilila noshoyo okushinga ino limangela mo okwa tulwa moilonga,” Sakaria ta ti. 

Sakaria okwa kunghilila oovene vomaumbo va kale va kotoka ngeenge tava fiye po omaumbo avo. 

Exumokomesho eshi tali ende tali nghonopala, neembudi otadi kufa ko omikalo dokukengelela. Ovanhu vamwe ohava shiivifa omadjepo avo komalungula osho hashi eta eembudi di nongele alushe apa ve li nonaini di na okuteya omaumbo avo. 

 “Waimina omahangano eameno momudingonoko woye ngaashi oneighbourhood watch oshoyo okushiivifila omukulunhu woshitaasi shopolifi apa ho di opo va dule okudengela po eisho ngeenge tava patolola. Eumbo nali kale li na omunhu efimbo keshe.  -wakudumoauleria@gmail.com