ONGWEDIVA – Ovabiisofi ve li moshipundi shetulumuko veengeleka da yooloka ova tanga Omukokolipresidente Sam Nujoma ongomulumenhu ou kwa li e na ekwatafano liwa nongeleka.
Omubiisofi Apollos Kaulinge wongeleka yaElcin okwa ti okwa shakeneka Nujoma momudo 1970 komutumba wa li koFrance, wa li oveleli veengeleka da yooloka va dja monyuni aushe.
“Komutumba okwa li atu kundafana nghene Ongerki onghwaLuteli tai ka yambidida Swapo pefimbo loita,” ta ti.
Kaulinge okwa ti Omukokolipresidente okwa li a fimaneka eengeleka molwaashi okwa kala alushe e na ohokwe yokulongela kumwe neengeleka.
“Ohatu pandula oilonga ya longwa kuNujoma. Omulumenhu ou okwa pumbwa okutumbulekwa nokomapupi tae uya molwaashi okwe tu etela emanguluko,” ta ti.
Kaulinge okwa ti ovanhu inava pumbwa okukwena edjepo laNujoma ashike nava pandule nokuhambelela efindano laye.
“Nujoma okwa findana nokwa wanifa po osho kwa li ta lalakenene. Okwa fiya a wanifa po oilonga yaye aishe unene tuu okuetela Ovanamibia ombili neputuko,” Kaulinge ta ti. Okwa ti nonande Nujoma kwa li a taalela omashongo pefimbo loita ina teka omukumo wokukondjifa eembulu dokatongotongo.
“Natu twikileni okukala nombili ei twa fiilwa kuNujoma. Omwenyo waye nau tulumukwe nombili,” ta ti.
Omubiisofi Shihala Hamupembe wongeleka yaAnglican oo a ile mopendjla omudo 2005 okwa ti Nujoma okwa lwa olwoodi liwa fiyo ta hange efindano.
“Okwa li tu li moudjuu weembulu tadi hepeke ovanhu moshilongo shetu ashike Nujoma okwa longa nondjungu ndele ta lwifa eembulu fiyo tadi fiye po Namibia,” ta ti.
Okwa popya ta ti Omukokolipresidente okwa li e hole oshiwana shaye noku na olukeno molwaashi paife Namibia okwa manguluka.
Omubiisofi Josephat Shanghala waElcin okwa ti okwa shakeneka Nujoma omudo 1983 omo va li komutumba wongongahangano yopaiwana koshilando New York shaAmerika.
“Okwa li hatu kundafana nghene ongeleka tai ka longela kumwe noSWAPO. Okudja opo otwa kala tu na ekwatafano liwa fiyo hatu alukile keumbo,” ta ti.
Shanghala okwa ti Nujoma okwa li omulumenhu omunambili e hole okuya kongeleka molwaashi peumbo lovakuluhu vaye kEtunda okwa li ha ningilwa elongelokalunga.
Okwa ti Nujoma kakwa li e na oukwamuhoko molwaashi pefimbo lepangelo laye okwa ninga ovanhu eeminista va dja komihoko da yooloka.
“Konima yemanguluko kakwa li tu na eepate, oiputudilo yopombada omeva nomalusheno ashike Nujoma eshi a ninga omupresidente okwe tu etela omayakulo,” ta ti.
Okwa ti Nujoma omulumenhu ou a pumbwa okutumbulwa kOvanamibia aveshe molwaashi ngeno ka li po ngeno Namibia ina manguluka. Natango, omubiisofi waElcin Shekutaamba VV Nambala naye e li moshipundi shopendjela, okwa ti Nujoma omulumenhu e hole oukumwe nombili.
Okwa ti Nujoma okwa kala omuleli muwa ye okwa li e hole oshiwana shaye ngaashi naana a shivika nawa kutya oye kwa li xe yoshiwana shaNamibia.