KAIǀAUB – “Sida ge !Khūb di ǀkhommi ai ǀgui ûihâ,” nēdi ge mîdi hîa !nāsa khoen ǀgâb xa !khō!namihe hân, Sakhoen ǀhûhâsib tsîna !khōǂgā hân Kaiǀaub !nâ ītama mâsib !nâ ǁan hâna xu gere ǂoaxade. 

Nē !khaiba xu kaise !nū tamases ge ǀawa!namn berosa mā, ǁîsa xuts ra napa ots ǂgomheǁoasa mâsigu !nâ plastikǁgaruna xu a !amǁaresa xūna ra mû hîa khoen nēn xa ǁîn omdi ti ra ǂhaihenase. ǀNî khoen ge nēpa ǁaupexa ǁkhaisa kurina ǁanhâ, ǀguis khami ī hui-e !âubasen tamase. Nausan ǁîna ǀkhurub huib ǂûrona xu ûihâ tsîn ǀnîna ǂkhariǂkharibe sîsenga ǁkhāsib !nâ hâ khoena dības ǀkha tsēsa xu tsēs ǁga ra ûi. ǁAupexan ge nē khoena ǁîn ra mîsa !oa haka ǁkhâga ǀkhurub huib ǂûna xawa tama hâ. Nē !khaib ge ǂkhari-omn tsî ǁgam-i tsîna ūhâ tama hâ, xawen ge kaise ǂgui khoen ra hâ !gao single kwartirgu tawa mario!nâse ǁgam-e ra hō. 

“Nē kwartirgu ge ǀgam ǂkhari-omra ǀguira ūhâ nē ǂgui khoen sîsenūs !aroma tsî da ge ǂguida âda !garob ǁga ǂhâsib ga hâ o ra !gû. Sida ge toxopa da ga !hū!âdi tsî hâ!khaina a  māhesa ra ǀkhomma kaise da !gomma !kharaga kurikamagu !nâ ra tsâ amaga,” tib ge Ben ǂNauseba gere mî.  !Nāsa !gāsasibab nē ǂgā-amdi ǂnamipe gere ǂgaoǀkhāhe soab aib ge Kaiǀaub !ā!khōmai-aob, Abisai Haimeneba nē  khoen hâ!nâ mâsiba ge ǂan!gâ. Haimeneb ge ge mî, ǀawemā!nans a ǁaxasa nē khoen !aroma !amku !khai-i hîan ǂhâbasa !gao!gao !oabadi tsîna nî hōse i-i ǁga doe-ūsa. Nē khoena ǂûs ǀkha huis soab aib ge ǁîba ge mî, ǀawemā!nans ge sō-e mās ǀkha ǀnai a tsoatsoa, xawe hoaǁae sâihe nî ǂûna ūhâ tama is ǀkha nēsa !nākorobe dī tamasa. 

“Nausas haka ǁkhâga ǂûna xawa tama isa a gaxu ǁae tsî nî ôa!gaohes ka i, xawes ge ǀawemā-aob berosa ǂûna ǁaekorobe presidenti beros !nâ-ū ra mā.