Auleria Wakudumo

ONDANGWA – Minista weyambulepo leedoolopa nomikunda James Sankwasa okwa talela po eeproyeka dayooloka mOndangwa oshivike shadja ko.

Dimwe domeepoloyeka odo ongaashi lolukanda lipe ledina Omashaka Proper, opate yaNguta, onhele yomeva ohanya neenhele dikwao dawedwa po.

Pefimbo ta talele po eenhele edi Sankwasa okwa holola kutya osha fimana okulongifa oilongifo ya kola mokutunga ile mexumokomesho lasha tali ningwa modoolopa.

“Eshi osha fimana mokukwatela po omatungo nokukwashilipaleka kutya okwa fikama oule weedula dihapu,” Sankwasa ta ti. 

Omukulunhuwiliki welelo lodoolopa yaNdangwa Ismael Namgongo okwa shiivifila minista kutya ove na ehalo lokukala tava longulula omeva onyata pefimbo tava talele po onhele yomeva onyata mOndangwa.

Namgongo okwa holola yo eeproyeka da yooloka odo tadi longifa oshimaliwa shomutengenekwamwaalu wo 2025/2026.

Omukulunhuwiliki okwa holola yo kutya elelo laNdangwa ola tula oilonga yeeproyeka dihapu tave shi ningi okukufa oshimaliwa penya naapenya, inave likolelela ashike koshimaliwa shepangelo.  

Mokutala aishe ya longwa kOndangwa, Sankwasa okwa pandula elelo laNdangwa eshi lihe na nande omukuli womeva a Namwater ile eendjo dolusheno laNored.

Okwa ti eshi oshi li efano liwa kelelo lodoolopa noshihopaenenwa shiwa keedoolopa dikwao.

“Onda mona eeproyeka dakula mOndangwa notava longo shili noudiinini. Oshinima shimwe nda hafela oshe shi kutya Ondangwa ohai longekida eenhele dovakalimo ovo tava tembulwa,” Minista ta ti ngaho. 

Sankwasa okwa ti omalelo eedoolopa ahapu ihaa longekida eenhele dovakalimo ngeenge tava tembulwa pomalukalwa avo.

Nonande Sankwasa a pandula elelo lodoolopa yaNdangwa, okwe va kumaida va wapaleke odoolopa. Okwa ti oshififa ohoni okumona oimbaapila neenailona da kangavala modoolopa.

“Eshi otashi etifa ovatalelipo ile ovapashiyoni itava kala ve na ohokwe okutalela po odoolopa,” ta holola ngaho. 

-Wakudumoauleria@gmail.com