ǀAsase ra sîsenxasigu di !ereamsa mâǀoa direktern Namibiab !Hū-omkhâis tsî !Hanaǂgās ǀAwemā!nans (NAB) din ge ge ǂganhe, in kō!gâ !gao!gao ǂûn di ǂganǀgaugu di ǀgapi ǂharoǀgauga tsî ǁnās ǀkha gere hōhō!nâhe, ǂûn hoan xa a sī!nâhe ǁkhā ǂganǀgaugu !nâ nî hâsa. ǀAwemā!nans ge ge ǂganhe in nē ǂgansa ǂâi!nâǁgui tsî xawe nau ǀkhāb ai omkhâis tsî ǀomkhâis !hū-omkhâis tsî !hanaǂgās disa ǂgaoǂgao!nâ. ǁKhātin ge ǀasa ǁanina gere ǂâiǂâi!nâhe is ǀomkhâis tsî omkhâisensa hoa khoena nî !khōǂgāse i tsî Namibiab !hūǁîn hîa ǂguro ge khaohâ khaisa ina ǁāǁb tsî !khō!om, !gōsase tarekhoesib tsî ǂkhamkhoena.
Nē ǂgansab ge ǂoa ge wekheb Donertaxs ai ministeri, ǂgarib tsî !hū-omkhâis tsî ǁgammās diba dī tsî ǀawemā!nansa ge mîba, 70%gu xa a !nāsa ǁanǂgāsaben !hū-omkhâis ai ǁîn di ûitsamaxūn !aroma ra ǂgomaiǂnûisa.
Ministeri ge noxopa a mîs ge, Namibiab noxopa hoa !hūbaisi !gôakhâigu !nâ ǀgamǁî !haros ai hōǂgās ǀguitikō-o!nâsib xa ǀoahâ !hūb ase a mâisasa. “Sada nî ǂkhâ!nâs proxramga ǂûna harebasens !aroma mās kara, o ǂâis !nâ ūhâ re !gao!gao ǂhâsib ǀkha da dīxūxa !khaisa hîa ǀnî khoen di ûiga ǁî-e xu ǀgui ûi!kharus !aroma hâsa, tsîs ǁnā-amaga ǂûna hoan xa a sī!nâhesa ǀgaub !nâ hâsa hoaǁae sada xa nî ǂâis !nâ ūhâse, mîǁguiga ōdi !nâ. ǀGui khoe-i tsîn ge tā !âs ǀkha sada !hūb !nâ nî
hâ, ǁnā-amagan ge !gao!gao ǂûn di ǂganǀgauga tā ǁkhābahesa nî !kharu,” tib ge ministera ǀasa ǁanin awemā!nans dinab gere ǀkhaeǂgā soab ai ge mî.
Shlettweinni ge ǁîna ge mîba, NABs di ǁguiǂams !hū-omkhâis tsî !hanaǂgāb ǂharuguba nî mûǂamsa tsî ǁnās !nâ-ū ǁawoǁawosa ǂûn nî !hanahe, ǁaeb ka ǁhā o aiǂhomihetoa tsî sâuǀgarahe tsî ǁamaxūs tsî sîsenūs !aroma nî ǂanǂanhesa. Ministeri ge noxopa ǁîna ge mîba, Namibiab !aroma i a ǂhâbasa !khaisa ǀoadisidi !nâ hâ ǂkhari ǀnōb di ǂgari-aona ǂkhâ!nâs ais ǀawemā!nansa ǂâisa ǂnûi tsî ǂâuǀoasasib ai ra dīǀoa ǂharuguba nî īǁkhā kaisa î da nēs !nâ-ū ǀguitikō-o!nâsiba oe-am tsî ûiǀgauga !gâi!gâi!nâ.
Namibiab !Hū-omkhâis tsî !Hanaǂgās ǀAwemā!nans di disi ǀasa ǁanin ge Hubertus Hammi (ǁkhawa go ǀgamǁî !nāsa a ǁhûimâihe aiǂnû-aob), Marina Mullers ((ǁkhawa go ǀgamǁî !nāsa a ǁhûimâihe !nakaǂnôa aiǂnû-aos), Gerhard Engelbrechti, Peter Kawanab, Salomo Mbaib, Jacob Hamutenyab, Sonja Molebugis, Maria Pogishos, Ruthy Masakeb tsî Violet Simataa hâna. Nē ǀawemā!nans ge !nona kurigu di ǁaeba nî sîsenxa, 2023 xu 2025 kōse