KATIMA MULILO – Sebelisomaswe ya bucwala ni lino zekola hala babanca mwasikiliti sa Zambezi neli zeñwi za lika zebilaeza muetapili wa kopano ya Affirmative Repositioning Job Amupanda. Nafitile kuzona kanako ya kuikopanya ni sicaba mwasikiliti sa Zambezi viki yefelile. Naize sebelisomaswe ibonahala kutotobela sihulu mwa likomponi za naikahela.

Naize napotezi likomponi zeñwi za naikahela teñi naboni buñata bwa babanca ba ba zwafile mwa bupilo. “Nelu ile kwa Dairy, Macaravan ni Cowboy. Naziba libaka za naikahela. Neku tomohisa pilu. Neni katani babanca ba ba se bazwafile hala bupilo. Yomuñwi wakubona natile kuna mi atoli, ‘hanina kuku patela kakuli uyo munca inge na. ‘Ali kuna nisebelisa lino zekola zazi ni zazi na kolwa, kapa nina ni masheleñi kapa mutu yomuñwi wanilekela. Naize hape kuli fokuñwi, ‘naya kuyo eza bubangoki kuli nikone kuleka lino zekola,” nekubulezi Amupanda.

Naize mutangana namusebezi zeo niha kubonahala kuli nali mwamayemo amaswecwalo, nafumani linepo ze 30 mwasitopa sa 12. Naize nazwile sikolo mi napalezwi kuzwelapili ni lituto za hae. “Mitangana bane ba pepezwi ni kuhulela mwasikiliti sa Zambezi, ba ba pila mwa makomponi ana ikahela, bani bulelela kuli bazwafile mwa bupilo, mi habana zaku eza konji kusebelisa lino zekola ni bucwala. Kutomohisa pilu. Kamita batu ba ba sebelisa lino zekola baipata. Kona likande lene lufumani mwahala ba banca. Lukona kutatulula cwañi butata bobuli mwasikiliti sa Zambezi ni naha kaufela? Kuswanela kuba ni kalabo,” nekubulezi muetapili wa AR.

Naekelize kuli nalemuhile bubotana mwalibaka zeo. “Mutu ukona kubona bubotana pata ka pata. Wakatana ni bona. Wabubona fa mibili ya basizana ni mitanga ba ba zwafile mwa bupilo,” nekubulezi muuna wa lipolitiki. Mwa manzwi ahae amayemo asikiliti mubusisi wasikiliti sa Zambezi Lawrence Sampofu naize ba ba bona zasilelezo basweli kusebeza katata kubona kuli kuna ni kozo ni buiketo. “Mikopano yakulemusa sicaba kuamana ni sipokola sa mwahae, bubangoki kwa miseto, busholi bwa likomu, bubangoki mwa mabasi, sebelisomaswe ya lino zekola hamocwalo ni lindalamiti zesika tubwa,” nabulezi.