OSHAKATI – Aamvu haya yakulwa pokapangelo okashona mOshakati kedhina Ou Nick mOshakati West, oya lulilwa sho haya konakonwa uupyu nombinzi komukeeleli gwomaliko ngoka ha shanga ye ta lesha muukalata wawo, manga aapangi ya ka fudha po.
Mboka haya mono omayakulo olundji pokapangelo hoka okashona oya oti kashi shi oshinima oshipe kuyo okuyakulwa komukeleli gwomaliko pokapangelona mpoka.
Omutoolinkundana nguka okwa li a mono omukeeleli gwomaliko ngoka a zala iikutu yiilonga yehangano tali ithanwa Omeya Investment ta yambidhidha aamvu mboka ya li momukweyo oshowo te ya lombwele shoka ye na okuninga.
Okwa li a tsikile okupupa aamvu uupyu, oku ya viha oshowo oku ya shangela momakalata gawo giipangelo, omanga omupangi ngoka a li ta longo pamwe naye a li a za po pakathimbo.
Omumvu gumwe ngoka a Ii a pupwa komukeeleli ngoka edhina lye lyi shiwike koshifokundaneki shika okwa ti, osha li she mu kumitha ta yakulwa komuntu a zala iikutu yomukeeleli gomaliko, ihe kakwa li e na nkene a ninge, okwa li ashike i iyutha kwaashoka ta lombwelwa.
“Osha kala sha limbilika ndje, nonda kala ndi na omayipulo ogendji, kutya pamwe omulongwapangi a zala iikutu ye mwene? Oshoka kandi wete omakalata goshipagelo ge na okukwatwa komuntu kehe gumwe kakele kaapangi nenge oondohotola,” ta popi.
Ta ti, shika oshikando shotango ta yambidhidhwa pauhaku komukeeleli gomaliko moshipangelo shepangelo.
Anelly Simion ngoka a li a eta okanona ke esiku ndyoka, okwa ti naye okwa limbililwa oshoka ke shi kutya shoka sha shangwa mokakalata kokanona ke oshili ngaa mondjila.
“Ngame ohandi longo osikola ihe ngele owa pe ndje okakalata koshipangelo kandi shi mpoka tandi ka tameke. Meme ngoka okwa tseyele kosikola yini okushanga uukalata woshipangelo, shoka taya ningi kashi li mondjila,” ta nyenyeta ngaaka. Ta ti, okwa li a mono aapangi yaakuluntu taya piti po, ihe inaya popya sha, kokutya oshinima onkalo ndjigilile.
Ta gwedha po ta ti, aapangi naya longe iilonga yawo, ihe hakugandja po iinakugwanithwa yawo.
Nelago Thomas okwa ti oha talele po okapangelo hoka olundji, ihe shoka tashi popiwa okwe shi mona iikando oyindji.
“Omukeeleli gwomaliko oha shanga shike momakalata gaanuumvu, nenge pamwe okwa li a yi kosikola yuupangi ihe ina mona iilonga? Aapangi yomokapangelo Ou Nick naya fatulule nawa oshoka inatu hala okupangwa iinima hayo,” ta popi ngaaka.
Omunambelewa omukuluntu muuministeli wuuhaku nonkalonawa moshitopolwa shaShana Johanna Haimene okwa ti shoka tashi popiwa onkundana ompe kuye.
“Inandi lopotelwa natango oshinima shi li ngaaka, ihe ngele oshoshili, kashi li mondjila nando. Otatu kutha onkatu opo tu ka ninge omakonakono opo tu mone ngele shoka tashi popiwa oshoshili nenge kashi shi shoshili,” ta popi ngaaka.
Ta ti, otaya ka pula kutya olye a pe omukeeleli gwomaliko epitikilo ndyoka.
– vkaapanda@nepc.com.na