Charles Ndeumane
OUTAPI – Aanyasha yomOutapi niitopolwa yopopepi oya etelwa po oshinyangadhalwa shayo shomauliko giipindi goOutapi Youth SME Expo 2024 shoka sha tulwa miilonga lwoshikando shotango uunambo mOutapi.
Aanyasha yomOutapi oya gongala mehala lyiigongi mombelewa yoshitopolwa shaMusati mEtitatu ya kwashilipaleke etulo miilonga lyOutapi Youth SME Expo 2024 lwoshikando shotango. Omauliko giipindi ngoka gaanyasha oga etwa po komuunganeki gwiituthi January Imvula nelalakano lyokweeta aanyasha pamwe, ya ulike iilongomwa yawo yo yi imonene iiyemo.
“Elalakano lyomauliko giipindi ngaka okuyambula po aanyasha paiyemo okupitila mongeshefa. Shika otashi ya pe ompito yokukwatathana naanangeshefa aakwawo opo ya longele kumwe ya humithe oongeshefa dhawo komeho. Otwa gandja uutala wokulanditha oshali kaanyasha ye li 100.
Omauliko otaga kutha ombinga okuza momasiku 2 sigo 6 Kotomba 2024,” Imvula ta ti.
Ngoloneya gwoshitopolwa shaMusati Erginus Endjala okwa tumbaleke aanyasha mboka ye ya po nedhiladhilo ndyoka lyOutapi Youth SME Expo, ta ti otashi ulike einekelo, ombepo yokunduluka, oshowo ehalo lyokukwathelathana maanyasha.
“Etulo miilonga lyomauliko giipindi ngaka otali ulike kutya aanyasha yetu oye na omukumo nehalo lyokweeta po sha shi na oshilonga.
Oshinyangadhalwa shika kashi shi ashike omauliko giipindi ashike ompito aanyasha ya ulike iipewa yawo ya yooloka oshowo okuyambula po onkalo yopamahupilo,” Endjala ta ti.
Endjala okwa ti aanyasha oya pumbwa okutameka okudhiladhila kondje yoongamba dhoshilongo niitopolwa yawo.
Ta ti moshitopwa shaMusati omu na uuyamba nomaliko ogendji ngoka aanyasha taya vulu okumona mo omauwanawa.
Omunambelewa omukuluntuwiliki gwehangano lyoIzzy Cranes ndyoka lyi li omuyambidhidhi omunene gwOutapi Youth SME Expo 2024 Isai Haishonga okwa tsu aanyasha omukumo opo ya
dhiladhile muule ya tote po oongeshefa dhawo dha yooloka kwaandhoka dhi li po nale.
“Ngame onda li handi longo metanga lyegameno lyo-NDF, ashike onda mono kutya oondjodhi dhandje oonene unene itadhi tsu ngele itandi ningi etokolo ndi tameke nongeshefa yandje. Ngele owu na edhiladhilo lyokutameka ongeshefa eyamukulo okutameka ngashiingeyi, ino tegelela oshoka oto hepeke ashike ethimbo,” Haishonga ta ti.
Omunambelewa muuministeli wiipindi niikwafaabulika Shikongeni Ntinda okwa kumagidha aanyasha moshilongo ya kuthe ombinga mongeshefa oshoka ogwo omukalo gu li hwepo okwiimonena iiyemo oshoka oompito dhiilonga odha ninga oonshona.
Ntinda okwa ti oongeshefa oonshona nodhopokati odha ninga po oopelesenda 90 dhoongeshefa muuyuni auhe, nodha gandja iilonga kaantu oopelesenda 50 muuyuni.
Omanga moNamibia oongeshefa oonshona nodhopokati odha gandja oompito dhiilonga kaantu ye vule 2 000.