Ominista yomauyelele nomakwathano gopaungomba Emma Theofelus, okwa kunkilila aalongithi yoongondhi dhopeke opo ya shangithe uukalata wawo yo ya yande okukanitha oonomola dhawo.
Theofelus ndhika okwe dhi popi sho a gandja oshipopiwa shuuministeli we mopaliamende mEtiyali. Ongoshitopolwa shomulandu gwa tulwa po, aalongithi yoongodhi oya li ya pewa ethimbo lyesilohenda lyopakathimbo nonande uukalata wawo owa li wa tetwa ko pokati kaApiilili naJuni 2024.
“Aalongithi yoongodhi mboka inaaya nyolitha natango uukalata wawo oya pewa sigo omomasiku 30 gaJuni 2024 nongele oya ndopa oku shi ninga nena oye na ompito onene okukanitha oonomola dhoongodhi dhawo. Ngele ongodhi oya tetwa mo thiluthilu mombepo nena ehangano lyoongodhi otali vulu oku anditha po onomola ndjoka komuntu gumwe iilile,” Theofelus sta fatulula.
Kuuyeelele wonuumvo, ehangano lyoCommunications Regulatory Authority of Namibia (CRAN) olya li lya ningi eigidho kutya olya tete mo pakathimbo uukalata wu li 567 298 sho ooyene yawo ya ndopa okunyolitha manga omasiku 31 Maalitsa 2024 inaaga thika.
Minista okwa kumagidha opo aalongithi opo ya longithe ompito ndjoka ya pewa yokunyolitha uukalata wawo.
“Esimano lyokunyolitha uukalata kali shi okutumbulwa. Olya simana noonkondo oshoka otali keelele uukengeleledhi hawu pitile moongodhi, uufuthi wuukwatya womuntu niikwawo yilwe. Oshoka kapu na ompango kaayi na oombululu dhomapuko, okukala nuukalata wa shangithwa ohaku kwathele mokuninga omakonaakono ngele opwa longwa uulingilingi, ko ohaku kwathele wo oongeshefa miipindi yokomalungula,” Theofelus a ti.
Oku ya pehululo lyaApiilili, opwa li uukalata wu li 2 172 379 wa nyolithwa. Moshilongo ashihe kumwe omu na uukalata wu li 2 387 230 tawu longo.
Sigo oompaka, Theofelus, ota ti Paratus Telecommunications no-UCOM oya nyolitha uukalata waalongithi yawo oopelesenda 100 omanga Telecom Namibia naMobile Telecommunications Limited (MTC) ya nyolitha oopoelesenda 70 no94 kehe gumwe.
Okwa tsu omuthindo kutya okushangitha uukalata oku li pamilandu dhopaigwana noshitopolwa oshiti-6 shoshiluku sha-V shokatendo komakwatathano komo2009 ngaashi ka nyanyagidhwa moGovernment Notice No. 40 mo 15 Maalitsa 2021.
-Nampa