Auleria Wakudumo

Immanuel Shangula nedina la shivika nawa Imms, omukulunhuwiliki wehangano hali ifanwa Pewa Omaano Trading CC nomunandjungu weedula 35 okwa lundulula onghalo yaye ongaumwe womwaavo va pewa ounongo woilonga yokomake.

Shangula oha nduluka oipundi, oitaafula noindulukomwa ikwao yomeefikola, meembelewa depangelo naadi dopaumwene oshoy o oku i longulula ngeenge ya teka opo i dule okulongifwa vali. 

Onghulungu ei oya hovela elihongo layo loilonga yokomake kofikola yoNamibia Institute of Mining and Technology (NIMT). Shangula okwa ninga yo omunelao okukwafelwa kepangelo opo e ke li wedele ko koUniversity of Namibia (Unam). Shangula pamwe navakwao vomoshikandjohoololo Omulonga moshitukulwa shaHangwena ova futilwa elihongo alishe kepangelo opo va ka mone owino yoilonga yokomake mOngwediva. 

Epangelo ola li la hala ovanyanyamaulu ava opo va mone owino moilonga yokeenyala voo va shiive okutota po eengeshefa davo vene nokuyandja oilonga kuvakwao momidingonoko davo. 

Okudja koUnam, Shangula ova hovela oproyeka yavo navakwao mo2019 ashike oinima inai va endela nawa shaashi kapa li eudafano liwa pokati kovanyasha. 

Mo2021, Shangula okwa holola kutya okwa mona omhumbwe yoipundi noitaafula unene moshikandjohoololo shavo. 

Osho oshe mu fininika opo a tote po ongeshefa yaye oyo a luka Pewa Omaano Trading CC. 

“Eshi nda hovela, kanda li ndi na oikwa noipangifo ya wana ashike onda ti itandi shuna omutwe moipeta. Onda kala hadi indile omashina kwaavo ve na ame handi yandje kashona aka ndi na po,” Shangula ta holola ngaho. 

Shangula ota dimbuluka eshi ofikola yaye yotete ye mu pa oteendela opo a nduluke oipundi noitaafula yavo. 

“Onanghali North Combined oyo ya pa nge omukumo opo ndi twikile oilonga yange,” ta holola ngaho. 

Ngaashi eengeshefa dihapu, Shangula okwa taalela omashongo. Okwa ti eshi a hovela, okwa kala ha indile omashina kuvakwao ye ta futifwa. Mokufutifwa, okwa enda yo ta lande omashina noikwafifo aeshe kooimwe nooimwe. 

Nande a hovela oye auke, Shangula paife oku na ovanailonga pamwe naye vanhe. 

“Ohandi yandje yo oilonga yopokafimbo kovakwashiwana vopomudingonoko opo handi ka longela. Luhapu ngeenge hadi xwikile oipundi ile oitaafula oyo ya nyonauka, ohatu i ashike vavali ile vatatu ame handi ka kufa ovakwafi pomudingonoko opo ovo handi futu,” ta holola ngaho. Pewa Omaano Trading CC oha longo oipundi, oitaafula, naikwao keefikola, koikondo yepangelo nomahangano opaumwene. Okwa ti oha kala e udite nawa ngeenge ovahongwa tava longelwa monhele i na oipundi noitaafula ya wana. Ta ti oha udu nai okutala nokuuda ovahongwa tava longelwa ofika ile pedu molwa oipundi inai wana ile vehena oitaafula yokushanga. Shangula okwa ti natango okwa pumbwa ekwafo okuyambula po ongalashe yaye. 

“Ohandi indile epangelo opo li kwafele ovanyasha ovo tava kondjo neengeshefa davo. Natango otwa pumbwa oshimaliwa shokulanda omashina amwe,” Shangula ta pula ngaho. Okudja mongalashe, Shangula ohe liyambe moshikandjohoololo shavo moinima yavo. Oku li omunashipundi wevava lovanyasha moshikandjohoololo shaMulonga, oha yandje ouyelele kombinga yeengeshefa odo ovanyasha tava dulu okuninga. Pewa Omaano oku li mOngha moshitukulwa shaHangwena. 

Nande ongaho, ongeshefa ei ohai nduluka oipundi noitaafula oshilongo ashishe. Shangula okwa ti ova nduluka oipundi noitaafula deefikola dokokule ngaashi Opuwo noKhorixas. 

-awakudumo@nepc.com.na