ǀAEǁGAMS– Swapo !Nans di Sekretare Xenerals, Sophia Shaningwas ge ǂoago wekheb Denstaxtsēs ai ge mî, ǁîs !aruǀî ǁnāti ī !hoan hîa Harabee !nans tsî Swapo !nans hâra hîa ge ǂoago kurib di kongres tawa gere mâ!oagu ra xa ǁnâu ǂgao tama hâsa. Shaningwas ge !nans ǁanina ge ǂgan in ǁî!nāpe nî hâ !kharagagusin tsî ǁnâusāguna ǂhāmâi, Swapos ra ôa-am ǁîs di ǀhûhâ ǂâisa !goaxa kurib di President tsî !Haosi ǂNûs ǁhûidi ai !ammâisa amaga. “Nēsi da ais ǁga ra kō soab ai ta ge tita ǀguis khami ī !hoa-i harambees tsî sawapos hâra di-e ǁnâu ǂgao tama hâ … hoada ge a ǁani nē kai Swapo !Nans dida,” tis ge ge mî, ǁnāpas ge ǂhôamāǂui!khaiga gere gowaǀî soab ai. ǀNî ǁanin nē aqerob ǀguib di ge i !nanra din ge nē xū-e xūmâi ǂgao tama ge i khāb ǀkha ge ai!gû. Harambee !nans hîa !Hūb di ǁûb tsî swapo !nans presidents tsîna ib, Hage Geingob xa ge danabahe is ge danaose nēpa ge ǂoaxa, ǁnāpab ge Jerry Ekandjob tsî Nahas Angulab hâkha ǀkha presidentsis !aroma gere ǀnûguse. Shaningwas ge ǀgaisase ǀgomǀgom!gao tsî ge mî, ǂgaeǂgui ra !nans nî ôa-amsa ǀgui!nâxasiba hōsa !goaxa kurib ǁhûidi ai!â. “ǁKhāti da ge nî ǁnâu!ā 2019ǁî kurib di ǁhûidi !nâs Swapo !Nansa mâ!oa ra !nandi !oagu nî ǀnûgusa tsî da ge nēs ǀkha Swapos ǁanin a ǀgarusa hîa ǀasa kurib !nâ a ǂgâ ǁoa.” Shaningwas ge nē ǂgaikhâisa Swapos di dana beros tawas !goaxa kongres, Swapos dis hîa Ramatex, ǀAeǁgams !nâ ǁgoes tawa 30 ǀHōǂgaeb disa xu 1 Hôasoreb 2018 dis kōse nî hâsa gere ǂanǂan soab ai ge dī .Shaningwas ge ǁkhāti ge mî, ǁnā ǁanin hîa ge 6ǁî hoa!nâ-aixa kongresa ǂoago kurib !nâ ǁhao!nâ hâ in guin nēsa nî ǁhao!nâsa tsî-i ǀguis khami ī !khō!khuni-i ǁanin di-e dīhe tidesa.