Eveline de Klerk
Swakopmund-Ministera goukungi nsitwe noudinguli Pohamba Shifeta kapi ana kuyihafera mukaro dona ogu guna kuzeruka omu vana kuhomokera vadinguli vantu vana kara noulingilingi omu vana kuhomokera vandinguli wokutunda koyirongo peke ava vana kara asi kureta yimaliwa mosirongo esi. Age katente asi eyi kuna kureta ruguwo morwa vadinguli kuna divataparara vatjotji ava vana kara asi kunataparara vahokone yimaliwa vangawo usimbu usimbu. Apa kahuyungisire vadinguli ntani vava nye vakara nomavango gokurara vagenda novakwatesiko momazuva gavali modoropa zaSwakopmund, owo vana kurugana oyo awo kuna kuyipika Edina lyongesefa ezi, ntani Edina nye lyosirongo mudima Namibia pontambo zouzuni. “ Mukaro nye ogu atungwana vadinguli moNamibia kwato ogu namona asi kapi yina kara yomutaro, morwa kuna kukambekako kuwoko mokutulisapo yirugana, kugusapo ruhepo ntani kuretapo mauwa gana kutunda ponze zosirongo ntani ruha nye oru. Ngesi kuna kara nye ngesefa ezi tuna hara kulihamesera unene, nye epuro asi ngapi natuyirugana oyo, nsene asi vadinguli kuna kuvavaka yininke yawo, nsene asi vana yasiki mosirongo setu Namibia, yimo ngoso ana kutanta Shifeta ogu ana kara noruguwo. Eyi kapi yina kara asi udigu kongesefa ezi kwelike, nye kuna kara udigu wosirongo nasinye. Nye age simpe kuna kutanta asi vakara novagavi magano goministeli ntani vaministera woruha oro nawo ngesi vana lituramo mokugusapo udigu ou. Natuvenye owo twahepa kulituramo asi ngapi natugusapo udigu ou, yipo tuture asi vadinguli vetu kuna kuyavatekura nawa. Ntani ose kuna kurugana nye unene moukanguki wawo yipo asi nepu yiko vana wiza oku kwetu vahepa kuyavatekura nawa. Yimo ngoso ana kufaturura Shifeta. Ministera gonsitwe ntani vadinguli katente asi owo vana kara nomukaro dona ogo simpe kukatunda hena modorongo noureru, nye simpe tavayarugana umbo wangoso awo simpe kunakundindira vakavapangure. Yipo asi nokomitiye odo mbali kwaditulirapo yipo ditare asi ngapi natugusapo udigu wangesi. Ruha oru rovadinguli kuna kara rumwe romulyo, yipo nye asi kapi nayiwapa asi turutarere vauzonagure vatjotji. Age simpe kuna kugwedako asi Namibia kwasidiva asi sirongo sompora, novantu vaso vakara nomukaro gomuwa, eyi yina kuninkisa asi ose kuna kara nye nomukaro ndi nompito zongwa tukulike sirongo esi kumwe novadinguli mosirongo.