OSHAKATI – Kansela mupe opo a li a hoololwa kOshakati shokOushilo Abner Shikongo okwa anenwa moilonga onghela.
Shikongo okwa pingena po nakufya Lotto Kuushomwa oo a xulifa muMay neudo konima e shi e lidenga po manga a li momutumba wolaata yopashiwana koWindhoek.
Moshivilo osho sha li shi na oitukulwa ivali omwa li yoo mwa anenwa kansela wUuvudhiya, Amutenya Ndahafa a ninga oshilyo shokangudumutima koshitukulwa shaShana.
Ndahafa okwa ya ponhele yakansela wOndangwa yodoolopa Elia Irimari oo kuyele neudo a li a ulikwa kuPresidents Hage Geingob a ninge ngoloneya wOshana.
Oilyo ikwao yokangudumutima koshitukulwa oyo Adolf Uunona kansela waMpundja nakansela waNgwediva Andreas Uutoni.
Oshivilo eshi shokuanifila ovahoololwa moilonga nehoololo loilyo osha li sha kwatelwa komesho kumangestalata momangu yaShakati, Antonius Shapumba.
Shikongo, oo oye a li okandidaate yoSwapo komahoololo okOshakati shokOuninginino okwa findana muAuguste neudo.
Ovakufimbinga vakwao momahoololo omo ovo: oshilyo shoPopular Democratic Movement (PDM) Theofelus Kamati, shoNamibia Economic Freedom Fighters Festus Shaduva, Elias Iiyambo woCongress of Democrats, Rebekka Kambayi woSwanu of Namibia naFiina Kuutondokwa oo a li okandidaate ye lifikamena.