ONHELEIWA- Inspekter Xeneral Joseph Shikongob ge ǀawa!namn hîa Namibiab !hūǀgoradi tawa ra sîsenna ǁawosasiba ge mā, ǁîn ûiǀgaugu ǀgūǁaeb !nâ !gâiba !oa nî ǀkharaǀkharahesa.
Okalongo ǂgigosi ǁhûi!nâǂharis di Onheleiwa ǀAwa1namn Beros di ǂhanusi ǁkhowa-ams tawab ge Shikongoba ge mîǁgui, ǁnā ǀawa1namn hîa ǁkhoaxa tama mâsigb !nâ tentdi !nâ !hūǀgoradi tawa ra hân !aromab mâsiba nî ǀkharasa.
Namibiab ǀAwa!namn hîa Namibiab-Angolab !hūǀgoras, Oshikangos dis tawa ra hân ge ǁkhoaxa tama mâsib !naka tentdi !nâ ra ǁgoe.
Nēpan ge ǁîna ǂkhari-omn, ǁāsen!khain tsî ǂûsâi!nâ!nā-om-i ose hâ. Mâisan ge !garob !nâ !garodī tsî ǀaes ai !auga ra sâi tsî !aorosa mâsigu !nâ tsēs tsî tsuxuba ra hâ. !Kharaga ǀnanub-tsî-ǂoab mâsigu !nân ge ra !kharu, mâsigu hîa ǁîn sîsenga ǂâuǀoasasib !nâ dīsa ra !hâumâina.
2023ǁî kurib !nân ge ǁkhā mâsigu !naka ge Bwabwata !Hū!nāsi ǀGuru!hanab tawa gere hâ 5 ǀawa!namgu tsî ǀguru!hana !ûi-aob hâga napab xa ǁîgu di hâ!khaib tawa ge ǂnau!anhe. “Sada mâisan ge hoaǁae ais ai ra mn ra hâs tsîna.
ǂHâbasa i ge a ǁîn ûiǀgauga da nî kō!gâ tsî ǀgau rah â!khaina ǁîna ǂhomibasa,”tib ge shikongoba ge mî. ǁKhātib ge ǁîba nē mâisana mâsib ga mâti a ī xawen ra ǀguixasib tsî mâ!kharus kha ǁîn sîsenga dīs !aroma koasa gere mā.
“Nē ǀasase ge omtoahe tsî a ǁkhowa-amhe Onheleiwas ǀAwa!nam Beros ge !âubasensa !oa ǂhanusi ǂgaoǀkhādi sîsenxasiga gaiǀgai tsî ǂhanub tsî ǂhanu-aisiba ǀkharib !nâ nî ǀgaigai, Namibioaîna ǁkh-ū,” tib ge ge mî.
Nē !khaib ge !nuri!gâs beros, 14 ǁgoe!! -omde aore mâisagu !aroma tsî 12 !nā-omde tare mâisadi !aroma, ǀgam ǁom!nâ!nāomra ūhâ oms, ǂûsâi!nâ!nā-oms tsî ǂû!nâs Sali, ǁgam-I ǁkhaeb hîa 10 000literga a tani ǁkhāb tsîna !khōǂgā hâ. Nē !khaib ge ǁaupexa N$7.5 miljun maris ǀkha ge omhe, om!nāxūn tsîna !khōǂgā hâse. ǂNuwis sîsenni ge 21 !Khanǀgôab 2024 dis ai tsoatsoa tsî 23 Aoǁkhumuǁkhâb 2024 dis ai ge omtoahe.
Omusati ǀKharisi ǀAwa!namn di Komisareb, Ismael Bassoni ge ǀawa!namna gere hōhō!nâ, hoa !hūǁîna huiba māsa ǁîn ga ,mâ !â!â-i tamas ka i o ǀkhariba xu hā xawe.