Ehangano lyokulesha onkalo yombepo olya tengeneke Shiyenga shaNangombe te ke ga tilahi momwedhi nguka Apilili, nonando ethimbo olya fa lyu uka pehulilo lyomuloka.
Ehangano olya ti Shiyenga ote ke ga dhenga pevi nawa okuza miitopolwa yokonooli ngaashi Zambezi, Kavango gokuuzilo osho wo gokuuninginino nomata omashona mOshana.
Okwa tengenekwa omvula tayi ka tsikila okuloka moshilandopangelo momasiku tage ya nonando ya mwena po manga.
Oya kwashilipaleke kutya omvula oyi na okuloka natango, onkene mboka ye li pomakungulikilo gomeya naya kale uupathi.
“Nuumvo okwa ndhindhilikwa iitopolwa yokonooli ya mono omata ogendji kiitopolwa iikwawo, nonando oondoolopa dhimwe nadho dha mono omvula oyindji ndjoka ya eta eyelu,’’ ya shanga ngaaka.
Nonando omvula ya li ya nyanyudha aanafaalama sho ya loko nawa, oya loko sha pitilila sigo ya yulitha iilya.
Omunafaalama Feneste Amutenya gwomomukunda Okando okwa ti ngashiingeyi aantu otaya teya iilya momapya omanga yamwe taya mana okulima sho ya li ya pululula. Amutenya okwi indile aanafaalama aakwawo yomomapya ya longe nuudhiginini opo ya vule okulikola mo shoka sha hupu po.
“Nonando iilya ya yi kohi yomeya otatu pandula oshoka oombinga dhimwe inadhi ya momeya,’’ ta pandula ngaaka.
Ta gwedha ko kutya oku uvu yamwe taya lili okapuka, ihe kuyo inaka thika ko.
Omunafaalama omukwawo Daniel Nathanael okwa kumagidha aanafaalama yakwawo ya yande okukala pookamba pethimbo ndika lyokulonga momapya.
Okwa popi kutya okwa koneke aantu oyendji taya dhenge ashike omangandja omanga ye na okukala momapya taya longo iipalutha yawo sho omvula ya loko nawa.
Daniel okwi indile aaleli yopamuthigululwakalo opo ku tulwe miilonga ompango ndjoka tayi thiminike oondingosho dhi kale dha pata pethimbo lyongula uuna aakwashigwana ye na okukala ye li momapya.