Auleria Wakudumo
Ehangano lokutengeneka onghalo yomhepo moshilongo ola holola kutya odula onghene tai twikile okuloka koitukulwa ya yooloka momukokomoko woshivike.
Onghalo yomhepo otai ulike kutya oitukulwa ngaashi Kunene, Erongo, Khomas noHardap otai ka lokwa odula yoshikungulu.
Onghulungu mokutengeneka onghalo yomhepo Odilo Kgobetsi okwa holola ta ti odula yoshikungulu otai dulu yo okuloka koitukulwa ikwao yoshilongo oyo inai tumbulwa.
Ovakwashiwana natango otava kunghililwa va landule omakunghililo aa a tulwa po.
“Ovakwashiwana ova kunghililwa vaha tauluke omilamba ile oyaana yomeva. Ohatu indile yo ve lilongekidile oshikungulu opo vaha kendabale nande okuya keefitola, keefikola nokeenhele dimwe di li mondjila yoshikungulu,” Kgobetsi ta ti.
Otaku hokololwa oshitukulwa shaKhomas sha mona omata odula opombada mexuliloshivike.
Oitukulwa ikwao nayo oya lokwa odula yoshikungulu oyo ya fiya eenhopa da teka neepate dimwe itadi longifwa pakafimbo.
Eenhopa
Omukulunhuwiliki mehangano loyeendifo, Sidney Boois okwa holola kutya onhopa pokati koWindhoek nOkahandja kopate yoB1 oya teka na itai ka longifwa manga.
Ovalongifi vopate mwa kwatelwa ovakalimo vomOsona ova kunghililwa va longife opate yoFreeway manga taku kuningwa eenghendabala dokulonga onhopa.
Okwa lopotwa yo vali onhopa pokati koWindhoek noRehoboth ya teka osho sha eta oyeendifo i kale itai dulu okudja moWindhoek okuya koRehoboth oshoyo okudja koRehoboth okuya koWindhoek.
Otaku hokololwa ovakwashiwana vamwe va kala mokati konhopa oyo ya teka okudja Etine nove ya okudja po Etitano eshi opate pa ningwa opate yopakafimbo.
Opate yopakafimbo oya ningwa kehangano lovaChina hali ufanwa China Railway Seventh Group Namibia noLithon.
Ehangano eli ola mana okulonga opate ei moule wefiku limwe.
Ka kele keenhopa edi, eepate dimwe moshitukulwa sha Kunene nado odali da pata molwa oshikungulu shodula.
Eepate ngaashi opate yokudja koUis fiyo okoKamanjab, opate yoSorris-Sorris ya finda koTwyfelfontein, Khorixas fiyo okoBergsig, Palmwag ya uka koKamanjab, Palmwag fiyo okoSesfontein nado odali da pata molwa omeva taa kunguluka okudja komilonga.
Ye shi nyona
Efiku lemanguluko nefiku lenangeko lomupresidente mupe Netumbo Nandi-Ndaitwah olo la li li na okudimbulukilwa mokapale komaudano moIndependence, Etitano moshilandopangelo nalo ola kalekwa molwshihenga shanangobe.
Nonande vahapu va uda nai molwa oshinima eshi, epangelo ola kwashilipaleka kutya ovakwashiwana ova tala oshivilo eshi koradio yomudidimbe.
Eendja
Hamushangadjai wongudu tai pangele, Sophia Shaningwa okwa fya oshisho kutya oikulya oyo yali ya nhuninwa oshiwana oya havalekwa ovakwashiwana ngaashi sha li shi na okuningwa pokapale.
Shaningwa okwa ti oupaki voikulya va koya po30 000 ova yandjwa kelelo loshitukulwa shaKhomas neebesa delelo lodoolopa yaWindhoek oda twala oikulya ei kovakwashiwana.