Victoria Kaapanda
ONGWEDIVA-Amushanga gwelelelo lyaNdonga Joseph Asino okwa yelitha kutya oye li metifa lyokulongekidha Fillemon Shuumbwa Nangolo a langekwe onga omukwanilwa gwOndonga, nonkatu yopaveta ndjoka ya kuthwa kuKonis Eino Kalenga okupataneka etokolo lyepangalo itayi ya imbi okuya komeho naasho sha kala sha longekidhwa.
Okwa tokolwa opo Shuumbwa a langekwe paveta momasiku sho taga kala 29 Juni nuumvo potundi 11 yongula.
“Shuumbwa ota ka langekwa momukunda Onambango, na kehe gumwe, moshilongo ashihe, ngoka e na ehalo okuthika okwa manguluka okuya opo tu ye tu tyapulile pamwe nokunangeka omukwanilwa omupe gwaNdonga”. Asino ta ti ngaaka.
Asino okwa li a gwedha po ta ti kehe ngoka ina mona ehiyo, oshowo iikundaneki, naya kale ya thika siku ndyoka. Ta ti natango oye li metifa okutsikila nokuhiya elangeko lyomukwanilwa omupe gwaNdonga.
Omaandaha goshiwike sha zi ko, Minista e na sha nomayambulepo goondoolopa niitopolwa yokuushayi Peya Mushelenga okwa li a nyolele Asino nelelo lyopamuthigululwakalo gOndonga, a tseyitha kutya epangelo olya tambula ko eindilo lyaShuumbwa opo a ninge omukwaniilwa gwaNdonga. Mokumona omukanda nguka gwa kala tagu taambathanwa komalungula, Kalenga naalanduli ye oya tula mo eindilo lyomeendelelo okupitila muhahende gwawo, taya pataneke etokolo lyaMushelenga. Shika osha li sha shololitha mbala aalanduli yaShuumbwa mboka ya adhika nale yeli mokati taya tyapula esindano lyawo.
Ashike Asino okwa ti kape na nande elunduluko mopologalama ndjoka ya kala po nale nokuli manga epangelo inaali itumbula moshinima shoka.
Omukwaniilwa omupe ota ka langekwa sha landula eso lyomukwaniilwa Immanuel Kauluma Elifas ngoka a li a hulu ko muMaalitsa nuumvo.
Aandonga oya kala taya nanathana metokolo kutya olye e na oku ya pehala lyanakusa Elifas ngoka oye a li a ulike Shuumbwa nokulombwela epangelo noshigwana kutya oye ta kala omulanduli gwe uuna a hulitha.
Ashike esiku lyehalakano kuuwa, kuku Selma gwaNandjokwe Shejavali okwa ulikile mboka ya li ya ya kehalakano kutya omukwaniilwa omupe oKonis Kalenga.
Pethimbo ndyoka aantu omayovi oya adhika nale ya gongala kegumbo lyaShuumbwa kOnambango hoka a gwayekwa onga omukwaniilwa gwoshilongo shaNdonga.
Shuumbwa naalanduli ye pokati mpoka oyali ya ningi iigongi iyali, nokwaashoka sha hugunina osho shoka sha li mOndangwa Trade Fair moka ya li ya ithana aakalelipo yepangelo, opo ya uve koshigwana. Gumwe gwomwaamboka ya li koshigongi omumwayinamati gwaKalenga ngoka naye a popitha oshigwana noku opaleka omitoto ndhoka anuwa dha popiwa kaalanduli yaKalenga.
Kalenga naye okwa ningile oshigongi lumwa ihe aantu owala aashona ya yi ko.