Ohamba yaNdonga Fillemon Shuumbwa Nangolo okwa ti elelo lavo ota li ka yandje edu kovanyasha opo va ninge oikunino younamapya. Edi Nangolo okwe di lombwela ngoloneya waShikoto Sacky Kathindi oo a li a ka talela po Ohamba oshivike shadja ko.
Ava okwa li tava kundafana nghene ve na oku longela kumwe opo va yambidide ovanyasha moshitukulwa. Nangolo okwa ti ounamapya owa fimana kovanyasha molwashi otau va kwafele okulwifa ondjala noluhepo tashi pile mokueta po eemhito doilonga. “Otwa didilika ovanyasha vetu vahapu ve na ounongo omanga vamwe ove li hongela omaifano kombinga younamapya ashike kave na edu lokuninga oikunino yavo,” ta ti. Okwa yelifa ta ti elelo ota li ka longela kumwe nombelewa yangoloneya okuyandjaneka edu kovanyasha okukala tava eta po oinyangadalwa yomaludi a yooloka ounamapya.
Ohamba oya kumaida ovanyasha opo va twikile okulonga nondjungu noshoyo okukakonga ounongo nghene ve na okueta po oikunino.
Ngoloneya okwa li yoo natango a yandje ouyelele kombinga yefundja olo ta lopotwa koshikandjohoololo Omuntele.
Okwa lombwela oshiwana koshikandjohoololo kwa lopotwa efundja opo shi xulife po okuenda oufiku momeva molwashi osha nyika oshiponga.
“Omunhu ina pumbwa okutauluka omeva ngeenge a nwa omalodu shaashi otadu okuwila momeva. Ovadali nava tonatele nawa ounona opo vaha ninge oihakanwa yokuxulifila momeva,” ta ti.
Okwa pandula oshikondo shouhaku moshitukulwa eshi sha yandjaneka omayakulo opaunamiti kovanhu ovo va ninga oihakanwa yefundja.