SIBBINDA – Richwell Mazumob ge mî-guiba ge ū, ǁîb !hanaǂgās di ǁkhāsiga sîsenū tsîb !hanaǂgāb ǂhargub ǀkha nî tsoatsoasa. ǁÎb !hanaǂûnab ge Sibbindas hîa Zambezi ǀkharib !nâ ǂnôas ǀhûhâsib ai ra ǁamaxū. Mazumob ra ǂgoms ge, naun ai mûmâi!gâs ǁ-aeb huka ge !kharusa. “ǀGūǀgarus ǁaeb Moseb ǂgaeǂguis !nakan ge Israelǁîna ǀhoma xu manaba gere xawas dib ge !kharusa tsî da sada tsîna ǂhanuba xu gui nî xawase isa a !âuǂnû ǁoasa. 

Sada ge ǁnâu!āb ǀkha ǂkhûdi âda sîsenū tsî ǁhawodi âda a sī!nâ -khā,” tib ge ǁîb di îxase ra ǀomkhâi !hanab âb ǁaegub !nâ mâse gere mî. Mazumob ge !hanaǂgarib ǀkha 2022-î kurib !nâ ǀgui hektar !hū!âs ai ge tsoatsoa. Nausab ǂgarib tsîna ǁîb ǁgoaǂuide ūhâ, xaweb ge -ǁîba ǁgoa!aromas di 03h00 ai khâimâ tsî !hanab !nâ ra sîsentsoatsoa tsî ǁnāpa xu ǀgui ǁîb ǁgau!nâs sîsenni ǁga ra ī. Skoli khao!gâb ge ǁkhawa ǁîb ǀaokhoen ǀkha !hanab !nâ ra ai!gû, ǁîn ǁōǂoa ge ǁgûb di ǁkhāǁkhāsa ai!gû-ūs ase. ǁGau!nâ-aob ge tamaden, !am peperdi, spinasi-i, kol-i, ǀarin, , ǀapase-i, mangon tsî ǂkhōn !aiab tsîna ra !hana. ǁÎb ge Katima Mulilos ha ǁaupexa 60 kilometerga a !nūs -ǁgan nî ǁama!gûs xa sī!nâhesa ǂgangaub ai ǁîb ǀhûhâsib khoen ai ra ǁamaxū. Spinasi-eb ge N$5 tsî N$10 ai ra ǁamaxū, kaisiba xu hâse. Mazumob ge ǁkhāti ûitsamaxūn ǀkha ǂgari, tsî mahangu-i, milin, !horo-i, papun, watlemub tsî ǂkhon !aiab tsîna kai ǀnōb ai ra ǁamaxū. 

ǀKhurub mâsib hâ, xaweb ge ǁîba ǂnīsase a mî ǁkhā, !gâi!gâxa!nâ ǂgaribab ǁîb di !gari sîsens tsî mâǁawosa xu ra sī!nâsa. Nauhâ ǂkhariǀnōb ǂgari-aon aseb ge ǁ-îb tsîna ǁgoaǂuide ūhâ, !gōsase ǁ-gam-i ǂnamipe. Nēsa oresa hōbas aseb ge ǁ-îb ǀhûhâsib ǀkha !hoaǁare tsî ǁgam-e ǀhûhâsib ǁgamamsa xu ra ǂgae, elektirib !nanǀgaiba ra sîsenūse. !Hanaba ǀgui ǁ-aeb ai ra ǂnâ paigu dīǀgaub di !nubusib hâ, xaweb ge xawadi ǀkha !hanaba ra ǂnâ, ǁnā-amagab ge ǁgoakorobe kaise furuse ra khâimâ îb skoli !aromas tsîna -aeb ai hâ. ǁîb ge ǂkhamkhoesiba ra ǂgan, in khâimâ tsî !hanaǂgāb ǀkhas ka xawe tsoatsoa tsî ǀgui ǂaisa ais ǁga dā, ǂnû tsî ǂhanuba xu ǀgui !âubasens !khai-i ai sī-ū ni tide amaga.