Ohamautsi –Presidente Hage Geingob katente asi silica esi somagongo sakara tupu asi sovaWambo, nye sakona kukara asi silica sokureta vantu pamwe, kureta marero gorudi pamwe, nanavenye Namibia mudima. Silica soMagongo, kukarako nkenye mvhura esi avatulisapo marero gorudi, kukara nye asi wokomuzongo gosirongo saNamibia, omu ava dana nye silica vana kutumbiura asi somawongo, omu vayitura asi nkareso zehuguvaro moyirongo yaAfrica nonkarapamwe zamo.
Kugusako nye omu twagadiva asi mawongo kutovara, (Omagongo) eyi avagusa nokuyirugana, vantu simpe kugusako magadi komawongo unene kombuto, aga avaruganesa kokuterekesako. Simpe magadi gomawoko kwagadiva asi mawa konohuki ntani kwavavahara kuliwapayika korutu unene. Mosihuyungwa sendi kakaresere Presidentye gona, Nangolo Mbumba siruwo sosilika sokudana ezuva lyomawongo esi kasikereko pomukunda gwaOhamautsi momukunda horowero Omasati, Geingob katente asi silica sangesi kuna kara nye asi sokulipa magano, ntani nkudiva omu avaparuka vakweneni nokugava asi vadinkantu vadive mparukiso zawo. ‘’ Melikwamo eli omu vatulisapo silica sangesi, kuna kumoneka asi Omagongo kapi hena sina kara silica sovaWambo velike, nye ngesi kuna kara lyosirongo nasinye. Eyi yina kulikida asi elikwamo eli kuna kukakara nye pontambo zouzuni omu lina kukasika pontambo zerongo mouzuni ntanio kuna kara elikwamo lya(UNESCO) mo 2015, mokukwama nye UNESCO nepongo lyendi omu vatura asi twahepa kupopera uhwi wetu ou twapinga, yimo ana kutanta Geingob.
Mokukwama Presidente, silika esi kuna kwateremo udano wompo ndi mpo nazinye, omu yina kara asi mpo kuvhura kugwanekedesa muhoko, kupakerera vaNamibia navenye. ‘’ Natuvenye, muhoko, twahepa kulihameseramo moyiviyauka yompo omu natutumangeda vadinkantu valihameseremo nokudiva mpo zawo nanayinye yapumbwa rudi. Mpo sininke somulyo unene, omu muna hamene ekuliko ntani ewogo. Yipo nye asi, twahepa kukara tunalipakerere, kukwama mukaro gwetu gopampo. Mokuyirugana oyo, eyi natutwara kousili ou natuvenye natukahafa, omu natukaruganesa nonkango edi asi Namibia gumwe, muhoko gumwe” yimo ana kutanta Geingob. Nye age simpe kageve ruguwo rwendi omu vantu vana kuruganesa epangwe ntani yikorwesa ntani eninkiliromo unene eli lina kuhoroka kovadinkantu vetu. Mukurona gepangero, kuna kuyimona asi vantu kuna kunwa unene marovhu, yiyo vana kara nye nonkorwe, kulininkiliramo parudi vharwa, unene vadinkantu. ‘’ Yipo nye asi kuna tugumu unene mukaro gwangesi, ose kuna hara kumona maudano gompo kuna kuhoropka, ngwendi moomu gana kara gomawongo, omu yitundwamo yina kugava erongo unene movadinkantu vetu, ntani movantu tupu navenye. Geingob kahundilire vagendesi womarudi pampo, ntani vawapayiki woyilika vakare tavayirugana ngoso yirete mukaro gomuwa movantu vetu.
Vana makuto kavakerepo kuna kara president gokuhova moNamibia, Dr. Sam Nujoma, nkuruministera Saara Kuugongelwa –Amadhila ntani nguuru gomukunda Omusati Erginus Endjala ntani nompitisili dopampo dokonomukunda dokomuzogo, ntani vamusinda nye mosirongo saAngola,UNESCO mukarelipo gwawo ntani vakarelipo woyirongo yawo. mwenya mukunda Hompa Oswin Mukulu gwaOmbalantu, katente asi kuna kara hepero kutura yompo mosirugana morwa vantu vetu kuna kuza vakazumbanese mpo zawo. ‘’ tupenisi vadinkantu vetu nampili nomvhura 20, mokudimburura asi muntu musinke ove hawe tavakazumbana. Kapisi yituvhure kutura asi vadive mpo zetu, ngano natukara asi kapi tuna diva oku twatunda noku tuna kuza. Yimo ana kutanta Mukulu. Ondonga ntani Ombadja yigo marudi nye nagakagava evango lyosilika esi somawongo mo 2024.
CaptioNn: