Minista youkashike koo okanhu nonghalo nawa yokaana Doreen Sioka okwa ti elongifo nai lomalodu otali hapupalifa omahepeko oukashike kookanhu a kale a londa pombada unene mOhangwena.
Okwa ti ombelewa yaye oya didilika oimbofa ihapu yomahepekafano a ningwa moshitukulwa osho ohai kala ya ningwa kovanhu veli koshi yomalodu eshi nohava kwatwa komhepo yokulongela ovanhu ominyonena.
Edi oda popiwa moshipopiwa sha Siyoka osha leshwa kungoloneya waHangwena Walde Ndevashiya Etine pefimbo va tameka oshikonga shokukelela omahepekafano oukashike kookanhu moHangwena komukunda Oshandi.
Sioka okwa ti Ohangwena oyo imwe ya didilikwa ina omwaalu muhapu woimbofa yomahepekafano oukashike kookanhu, nomwa lopotwa oibofa ili 5427 momudo 2019/2020 omanga oimbofa 2643 oya lopotwa momudo 2020/2021.
Okwa ti oimbofa yomakwatonghonga oyo imwe ohai etwa kovanhu ngeenge va longifa omalodu mahapu eshi ovalumenhu hava kala tava kwata ovakainhu onghonga ngeenge va kolwa.
Okwa ti oshikonga eshi otashi twikile okukala tashi ningwa momikunda da yooloka mOhangwena fiyo omafiku 10 Desemba eshi Namibia ta ka dimbuluka efiku loufemba womunhu.
Okwa kunghulila oshiwana shomOhangwena opo shi kale tashi holoka momwaalu muhapu koikonga shomahepekafano opo ovanhu va kale va xwaxwamekwa okuxulifa po okuningila ounona nokuhepekafana momaumbo.
Minista okwa ti ovanhu na va kale tava longele kumwe okukondjifa omahepekafano moNamibia opo onghalo ei ikale ya xulifwa po.
“Ovanhu nava kale tava lopotele opolifi ile eembelewa detu ngeenge tava ningilwa omatilifo momaumbo,” Sioka ta ti.
Okwa weda po ta ti ovalumenhu nava xulife po okukala tava kwata ounona voukadona vashona keenghono shaashi eshi otashi yandje efano lii kounona voumati.
Koshikonga okwa li kuna ovanhu va dja momikunda da yooloka, nopolifi tava topolafana omayele nehongo kombinga nghee sha fimana okuxulifa po omahepekafano omaumbo.
– fhamalwa@nepc.com.na