Ominista yoinima ya pamba oukashikekookanhu Doreen Sioka okwa ti oku udite Ovanamibia tave mu ningi okaponda mufita eshi tava ti na fiye po oilonga –afa oye aeke e na oshinakuwanifa shokukondjifa omahepeko opaukashike kookanhu.
Omunista oya popya enyeme layo eli, pefimbo ya ya meenghundafana nodjonghundana yaNampa mEtivali
Omolwa omivalu domahepekafano opaukashike koo okanhu oo unene e na omadipao nomahepeko taa difa omaxwilili taa ningilwa ovakainhu nounona, ovakwashiwana vamwe ova tameka tava pula opo Sioka a dje mo moilonga shaashi vati ouministeli waye itau longo sha.
Ashike Sioka okwe li amena ta ti ovo tava ti nandje mo moilonga inava tala nawa shaashi haye aeke ha toto eeveta moshilongo.
“Ovanhu otava hoolola oku mosha eshi va hala oku mona. Ashike ka shi wa nee. Oku kala to popi Doreen a fa oye aeke, kashi li mondjila. Doreen haye aeke ha toto eeveta moshilongo omu. Eeveta oda talululwa nale mekwatelo komesho lomunista youyuki. Omolwa shike aame ndi na oku pewa ombedi? Eeveta odo di na oku talulilwa oda pwa nale. Omolwa shike ovanhu hava mono ashike eshi va hala oku mona?” Siyoka ta pula.
Ominista youyuki okwa teelelwa i ka leshe eenhotwa-veta dipe odo dimwe domudo da kwatela mo oveta yoku lwifa ekwatonghonga, etalululo loveta ili omhinge nomahepakafano omomaumbo nai kwao yoku tala komalandulafano okuungaunga noinima ya nyika oulingilingi.
Mefiku omo tuu omo eshi President Hage Geingob a patulula eumbo lomutumba wopashiwana pambelewa okwa ti okwa pandula shaashi oveta yoku lwifa ekwatonghonga, etalululo loveta ili omhinge nomahepakafano omomaumbo ola kwatela mo ehandu lili mondjila oku handukila ovakayulinyanga oshi tashi ulike kutya epangelo ola tala nomesho a pwa mo no itali li didimikile oshikoya eshi. Ta ti oveta ei otai ka hongolola ovanhu ove ve na omahalo oku longa oikulumuna yoludi olo.
“Oshiwana osho shihe na eameno lovakainhu nounona, itashi dulu oku li nomena onakwiiwa ili nawa. Oikulumuna tai longelwa ovakainhu nounona moshiwana shetu oya lundalala neenghono noi na oshidjemo shinyanyalifa. Onghee ita i dulu oku li didimikulwa,” Geingob ta ti.
Geingob ta ti onga onghendabala yoku tunga eumbo laNamibia, epangelo oli na omhangela yoku tunga oshiwana sha amenwa, omo keshe omunhu, wepipi keshe, omuhoko, oukashike kookanhu, ta kala mo eudite ohole neameno noku na ehafo meumbo laye ile mokati koshiwana eli mo. Ta ti osho shi na oshilonga neenghono oku kaleka po oukwatya waNamibia unene tuu ekale ko po leeveata odo tadi amene noku keelele omalihumbato nomalinyengo oo taa tula moshiponga eenghalamwenyo dovakwashiwana ovo vehe na eenghodo doku li amena vo vene.
–Nampa