NANKUDU-Vaveli vana kukondera mosipangero saNankudu kuna kurara kwahana nonguwo, konyara kuna kara kwedi nakunye kutunda tupu mahina zokukuhwisa zateka. Sipangero esi kwakara momukunda Nankudu, momukundahorowore gwa Kavango West, konyara nokilo 100 koutokero waRundu. Ehina lyokukuhwisa kwatekere mokwedi kwaSindimba mvhura zina puko.
Kutunda nye opo nonguwo nomakehe gokunyata kuna kara tupu nye vana gapongayike ponze zosipangero koruha rwina ava kuhwire. Sepangero kwatuma tupu yimwe ngwendi nomusato nomakehe gokudumika matarase nonomudwaro dovaveli koRundu, omu ava yayikuhu wokampani zokukuhwa zalikarera pwazene. Varugani ava rugana mosipangero kavatente asi konyara noguwo dokusika ko200 ngano vahepa kudituma koOndangwa omu navakadikuhwa wokampani zokulikarera. Eyi kapi yahoroka, anao noguwo ngesi nare dina tameke kugava mukarodona. Ava nye vakutira yokukuhwa ngesi awo kuwiza tupu koyirugana vayalilikide asi vana wiza kwato eyi vana kurugana. Apa kakadingwire munambudi ogu sipangero esi,kwato nokumonasi nampili guwo zimwe mononzugo ne nadinye edi kapitire. Vaveli kuna kusivana asi kapi vana kuvapa noguwo siruwo esi kuna kukara asi mpepo zina litjindji. Yipangerogona ngwendi Mpungu, Rupara ntani Mburuuru yakara asi kugwanena uwa kosipangero saNankudu kuna kumoneka asi ngesi yina vagumu nawo kapi tavakara nonoguwo dina zere. Mukurona gosipangero saRundu age hena yige ana kara asi mukondi ko sipangero saNankudu Ndokotora Juri Yangazov, katente asi kapisi vana Nkudu velike nomoRundu namo kuna kara noudigu wangoso. Mahina kwateka nare konyara makwedi ntazimwe gana pitipo kapi vana kara nehina olyo. Eyi kayitente asi kampani zopaumwene kapi zina kuvhura kurugana yirugana yoyinzi eyi ntani hena awo kuna kupura ndiro mokurugana sirugana esi. Nomahina dimwe kuna kara dina rugana nomvhura 30, yimo ana kutanta Yangazov. Nokugwedako asi epangero nare lyagava sirugana esi kokampani asi vahepa kukuhwa noguwo edi ntani kampani nazo kwambesitera nomahina donompe koyirongo yopnze nye yahepa kukwata siruwo ntani ngayiyasika oku.