SIPATELA sesi tuna sa Katutura mwamulenen`I wa Windhoek nesi kilwe sa tasezwa ki likayamana la mezi la bulalu sunda ye felile kasamulaho paipi yen`wi ya mezi I lobeha. Mwamazazi a felile a sihulu la butanu ne kusina lisupo za kuli paipi ita sebezwa hande mane ni kufita kwa maungulo. Tanka ya mezi yene kilwe ya tambekwa kiba katengo tuna ka mulenen`I wa Windhoek, ki yene nze sweli kutusa mwamazazi kaufeela a. Likayamana la mezi neli kile la tisa mutiyo o mun`wi kwabaoki kaukuli nenze ba sweli kuno talimanga bakuli hamohocwalo ni kubona kuli mezi a kiwa kwatanka yene kilwe ya yemiswa yeo ki katengo ka mulenen`i. “Musebezi ki o mun`ata mi ha kubonahali feela hande,” ne kubulezi muoki yo mun`wi kwasipatela mwamazazi a felile. “Likayamana la mezi le, li ezahalanga mwalinako ze shelana sihulu ha kufita libiki ze peli kakuli mapaipi a tubehanga. Libaka za mutabani za sinyehanga ni kutisa munko o maswe luli ni kutisa kuli mane ku sike kwaba ni mezi a kutapisa fafasi ya sibaka kamukana sa sipatela. Lika hali zamayi feela hande kwanu,” muoki na kile a ekeza. Maofisa ba ban`wi ba sipatela neba kile ba bulela kuli kamaniti mezi ki a manyinyani mi kacwalo a kona feela kuitusiswa mwa misebezi yen`wi isi kaufeela yona. “Ka kuli lu baoki selu kutapisa ni bakuli, kuba fa mezi a kunwisa milyani ya bona mi haiba kuli inge kusina mezi hakuna selu kona kueza luli. Lu inzi mwalikayamana luli kakuli nihaike kuka mezi ha ki musebezi wa luna,” ne kubulezi muoki yo mun`wi. Maofisa ba makete neba kile ba taluseza mutende o kuli, paipi ya mezi yeli buse bwa sipatela ki yene kile ya lobeha. Muofisa yo mun`wi na kile a bulela kuli paipi nese supezi mi kacwalo nese inzi mwamubu lilimo ze mashumi a malalu. Sipatela sa Katutura nesi kilwe sa yahiwa mwasilimo sale sa 1973. Sipatela si potelwa ki bakuli ba palo ye likana 1 889 mwa kweli I lin`wi kubeya palo yen`wi ye pahami yaba ba lobazwangwa. Hana kile a alabela fa likayamana la sipatela sa habo, Likwambuyu wa Likolo mutompehi Richard Kamwi na kile a bulela kuli ba Likolo la Misebezi, Linzila ni Liswalisano nenze ba sweli kuno sebeza fa likayamana leo ka bunabwangu luli. “Likayamana leli swana sina le li bonwa kiba Likolo la Misebezi. Ni ikopanyize ni likwambuyu Joel Kaapanda ni ku mukupa kuli a ni tuse kakuli ha kuna mezi kwa sipatela sa Katutura. “Batu ba swanela kuswala lipilu kakuli lika kaufeela li inzi mwamazoho a Likolo la Misebezi mi banze ba sweli kusebeza fa sibaka mwanako ya cwale,” ne kubulezi Likwambuyu Kamwi mwamazazi a felile. Na ekelize kubulela kuli matata a cwale ka mezi ni mulilo wa magesi anza swelwi kuno bonwa mwalibaka za makete ze shelana mwanaha ki matata luli a taselize Likolo la habo kono a inzi kwahule ni musebezi wa hae sina bun`ata bwa ona hasa weli mwamazoho a hae ka kuba likwambuyu. Ze ni halili cwana na kile a fitiza manzwi a kuli lika kaufeela linze li swelwi kuno talimwa kuli tatululo sakata I konwe kufumanwa. Mun`oli ya “Inelelezi” mwaLikolo kapa yena Mun`oli yo Muhulu wa Likolo, mutompehi Kalumbi Shangula na kile a fitisa manzwi a swana. Butata bo bu taha mwanako ye kusani feela kuzwa sipatela sesi tuna sa Windhoek Central si kena mwalififi, mwamazazi a sikai feela. Ne ku kilwe kwabihiwa kuli lififi la mulilo wa magesi neli kilwe la ekezwa ki kutokwa ni lisebeliso sakata za sipatela ili nto yene tisize kuli mane n`aka yo mun`wi yana patehile ni mukuli yo mun`wi a siye musebezi wa hae ni kuikela kusili ‘toho ya hae inge I opa’.