Malakia Nashongo

OSHAKATI – Banana babapepiwa ni buanga bwa mautu, kanako yacwale sebakona kuotolowa mautu, kwa sipatelanyana sa mautu kwa sipatela se si tuna sa mubuso sa Oshakati. Kuzwelela sipatelanyana hasikwalulwa mwa silimo sa 2014, si tahisize cinceho yende mwa bupilo bwa banana. Muzamaisi wa makete mwa sikiliti sa Oshana Johanna Haimene naize buanga bo bufumaneha hahulu kwa bashimani. 

“Sipatelanyana sibapala kalulotuna mwakufukuza nombolo ya batu ba ba pila ni buanga mwa sicaba sa luna, mi kanzila yeswana si imulula mutiyo wamubuso hala tuwelo ya buanga,” nekubulezi muzamaisi.  Nabulezi hape kuli likalafo zeo likutiseza maikuto ni sepo ya mutu. Kutisa cwale banana ba 215 seba alafilwe, mi bapila bupilo bobuswana ni bwa banana ba bañwi. Ba 169 basweli kufumana likalafo, mi ba 27 balibelezi.

Mwanana hasa fumani likalafo za buanga bwa mautu, kukona kutisa kuli abe ni buanga kuya kuile ili kutibela mwanana kuli asike aikola lipapali zeba bapala banana babañwi ni kuya kwa sikolo. Hape kukona kutisa kuli banana babañata bapile ni buanga nikuli baiñolise kufumana tuwelo ya buanga, kuekeza kwa palo yeo mubuso una ni kubabalela.

Kwamulaho batu nebana ni kuliba kwa Windoko kwa likalafo zeo, kikafo kamaiso ya sipatela sa Oshakati ikile yafa lituto kwa baleki kutatulula butata bo. Kuzwelela sipatelanyana hasikwalulwa mwa silimo sa 2014, situsa likiliti kaufela zefumanena mutulo wanaha ili Oshana, Oshikoto, Omusati, Kunene ni Ohangwena hamoho cwalo ni kwabuse bwa museto mwanaha Angola.