Ministers, ǁGau!nâs, ǀAsa ǂâiǀgaun, ǂKhamkhoen, ǂgamǂgamsenhurun tsî !Hao!nāsi ǁNaetin dis, Sanet Steenkamps ge ge mî, Namibiab ūhâ ǀkhamasa ǂhanugu tsî xoaǁguigu hîa ǀgui!nâxasiba !hū!nāsise ra ǂgaoǂgao!nâgu hâ hîas ge !haoǀgorasa skolgu !nâ ǁkhaubas di sîsenǂuib !kharagase ra ai!gû-ūhesa. Nē mâsigu ge !haoǀgoras !nandi hâs tsî ǂgaiǀkhāgusa ra !aroma. Nampas ǀkhas ge ūhâ i dî!nâ­gamǁare-i !nâs ge Steenkampsa ge mî, ǁkhāǁkhāsenaon ǁaegu ra ai!gû !haoǀgoras a ǂâiǂhansen !khaisa, nēs ra ǁgau!nâs di dana !aromasa ǁauǁau tsî Namibiab !hūǂhanusi !gâi ǂūsigu hîa ǀguitikōsib tsî ǀgui!nâxasiba ra mâbaga ra mâ!oasa.

“Sada !Hūǂhanub ge ǁnāti ī !gao!gaob ǀgui!nâxasiba !kharagasib !nâ ǁkhaubas diba ra !namiǂgā. ǁNā-amagas ge sada ǁ­gau!nâsa nî dana i nēti ī ǀgui!nâxasib !gao!gaoba nî !khōǂgāsa.!Hau!hausase hâ !khais ge, nēti ī ǁgaragu tsî daoǁgaugu hâ, xawes sîsenxa kaisa !hūb a ǂhabase skolgu īse ra !kharagasa,tis ge ministersa ge mî. ǁÎs ge mîs ge, skolgu ra ǁGau!nâs ǂHanumās 2020 dis tsî xoaǁguigu tanisenǀgaugu digu xas tsîna daoǁgauhe hîa mâ-i ǀgui-i ka xawe ǀgora-e disa ra !khâikhomsa, xawe hâ 1khais ge ǀnî skolgu tawan !haoǀgoras ai ra dīhe ǀnore!hoan, ǁoregus tsî ǁaraǂuisase tsâ kais mâsigu ra hō!âhesa. “Sada ge mû tama khami nē ra ī amabe xūn !oagu a tanisen ­ǁoa.

Nē !khâikhomde ra !ûǂamn !oagu gu ge ǁkharakha nî māǂuihe mâ !harib hoab ai,” tis ge ge mî.Ministers ge ǀaro tsî a mî !khais ge, ǁnāpa di ra dana!khaidi hîa khoesis tsî ǀgui!nâxasiba !gôa!gâs dide !kharaga ǁkhāǁkhā!âgu !nâ a !khōǂgāsa, aiǁgause ûib ǁkhāsigu, !nae!khaidi tsî ǀhûhâsib !gâi ǂūsigu tsîna, xawe gu ge !nāsa skolga mâtigu nē ǂande tsēkorobe ûiǀhaos !nâ nî mā1kharu tsî sîsenǂuis di !nubusib ǀkha ǂnôa. Ministers gere noxopa mîsa !oan ge ǁgau!nâ-aon  ǀgaisa !âsa ra ǀhuru, ǁkhāǁkhāsenaona unusa, !gâi tanisensa nau !hao!nāsi !nandi !oagu ūhâ tsî ûiǂuis !aroma.“Sada ǁgau!nâ-aon ge ǀgaisa ǁuib ase hâba da, xawen ge ǁāǁāhe tsî nî ǁnâu!ā ǁîn mûǁae-i !haoǀgora-e dīhe tsî nau ǁkhāǁkhāsenao-e ǁgâi!gamhe tide !khaisa. Nēs xōkhān ge ǁîna !gâi aiǁgausa hoaǁae nî ūhâ !gâi tama dīǀgauga ra ǂharasa ­ǁîn di ǁkhāǁkhā!nā-omdi !nâ,”  tis ge ge mî. ǁÎs ge ǀhûhâsiga ǁawosasiba mā tsî ge mî, ministeris nî ai!gûsa skolgu ǂhanusi xoaǁguigu tsî ǁkhāǁkhākhâis proxramga ǁaekorobe kō!gâs ǀkha îs nēs !nâ-ū ǁawoǁawo, skolgu hoana !khōǂgās di !gao!gaob ai noxopa nî hâsa. – Nampa