Kaino Sheehama
Opuwo zoponze zodoropa-sure ezi kavadikire sinkwa ntani zaOtjinanua zoprimere zakara moOpuwo ponze zodoropa ngesi kavazigeve nye paveta koministeli zeronmgo, unkurungu ntani mpo sivike sina puko. Evango eli, kwalitulisapo kupitira moOndao elikwamo lyerongo, omu nye avagwana mbatero kwa Georg na Monika Hahn mokupitira projeka ezi Kaokoland e.V kumwe neruganeno na Gabathuler vakara asi wokudika matungo.
Ondao elikwamo eli kwaliretesapo asi ngano vabvatere vantu ava vakara asi kapi avatungu pamwe tupu, vaHimba vatunga sinzi sawo, moOpuwo. Evango eli lyosure kwadikapo nonkondwa rongero ne, nonzugo dokurara vanasure mbali, nonotoilet damo, nzugo zokuterekera, zokulira,nzugo zokupungwira, mberewa zosure, ntani mambo gane govamitili. Azo ngesi kuna kara novarongwa wokusika ko 93 kutamekera kontambo ndunge zetateko dogoro ntambo ndunge zautatu.
Awo kuvaronga vamitili vatatu avarongo yirongwa nayinye yonontambo ndunge odo. Mosihuyungwa kavaresere kukwateramo nguuru gomukunda Kunene, Vipuakuje Muharukua kakere ana hafa morwa vana gwana uhwi ou wosure. ‘’ Erongo kuna kara simwe somulyo unene omu nye munatokora asi vanona gona wopoOtjinanua kapisi vavasige konyima. Elituromo lyeni kuna kumoneka asi erongo kapisi asi lyepangero tupu, nye kuna kara situmbukira sanatuvenye.
Vaholi vetu ngwendi nyone ngoso, muwizamo, kunakulikida asi meho zovana vetu kunakuwapa- nampili ngapi omu vakara ure nodoropa, yimo ana kutanta. Opuwo zoponze zodoropa kansela gwawo Western Muharukua nage gumwe kapandwire wokugava uhwi nokuhundira asi vamitili valituremo unene. ‘’ Varongi, one kuna kumundindira asi mwahepa kulituramo unene moyirugana yeni. Mwahepa kuwiza kosure nosiruwo, kareni posure kutunda momandaha dogoro moutano, makura Otjinanua kuvhura zikare sure zomutaro,’’yimo ana kutanta.
Age simpe kahundilire vakurona asi vatume vana vawo kosure, nokutanta asi uzuni kuna kulitjindja. Spectora gerongo momudingonoko gwaOpuwo Naftal Uusiku kahundilire varongwa asi varuganesa evango eli mokulironga unene. ‘’ Ose ngesi tuna gwana uhwi wangesi wounzi, vamitili nyone meho gepanmgero apa ngesi posure. Mwahepa kudiva asi yininke eyi muyikunge momunene. Kapisi asi tukare tupu nomakuma gomawa nye twahepa kukara nerongo lina wapa momunene.
Yimo ana kutanta Uusiku. Mugavi uhwi, Georg naMonika Hahn, kavageve ruhafo rwawo omu vana gavako kerongo unene posure zaOtjinanua, nokutanta asi awo navavatera sure mokuzikulika nsene asi nayikara hepero. Projeka Kaokoland, ngesi awo nare vatungako nosure 30, nonokindergarten momukunda gwaKunene, omu vana kulikida mukaro gwawo kuhamena erongo. Kaino Sheehama mugavi nombudi koministeli zomapukururo-Kunene.