Ofikola Lazarus Haufiku Combined oya yambididwa noikwafifohongo kehangano loSwakop Uranium oshivike sha dja ko.

Ofikola oya pewa eekompiuta nosho yo odalate yokuninga oluumbo lofikola nosho yo tuu.

Ofikola Lazarus Haufiku  oi li moshikandjohoololo shaShikunde moshitukulwa shaHangwena.

Okwa didilikwa eefikola dihapu moshitukulwa shaHangwena hadi pewa omakwafo oikwafifohongo komahangano a yooloka. 

Naashi otashi ulike oukumwe nosho yo efano liwa okushakeneka epangelo ondjilakati. Moshipopiwa shaye Minista wehongo Anna Nghipondoka okwa ti omaano a pewa ofikola otaa yandje omukumo kovanafikola ve lihonge nondjungu. 

Okwa weda po ta ti osha fimana ngeenge ovanafikola ve na oikwafifohongo opo ovahongifikola va longe noupu.

Nghipondoka okwa pandula ehangano loRossing Uranium molwokuyambidida oshikondo shehongo.

Okwa kumaida ovanafikola opo ve lihonge nelitulemo molwaashi otashi va kwafele okupita noitwa iwa kexulilo lomudo.

“Ovanafikola ovo ovaleli vokomongula. Epangelo otali kwashilipaleke kutya okaana keshe Okanamibia oka longwa,” ta ti.

Okwa indila oshiwana opo shi kale shi na oukumwe mokuyambidida oshikondo shehongo.

Okwa weda po ta ti ovadali nava kale ve  na ekwatafano liwa noukumwe novahongifikola. Ofikola Lazarus Haufiku Combined oi na ovanafikola 566 okudja ondodo yopedu fiyo 11. -fhamalwa@nepc.com.na